Diabierna 24 di mei 2024 a tuma luga un reunion conhuntamente cu diferente stakeholders pa trata e bienster di nos animalnan como tambe pa atende e cambionan di maneho y reglanan di CDC na Merca cu lo drenta na vigor entrante prome di augustus venidero.
Tur presente a ricibi un presentacion di e maneho nobo ‘Maneho Bienestar di Animal Aruba’ cu tin como vision pa mehora e bienestar di animal y crea un Aruba cu ta mas amabel cu nan.
Mientras tanto ta siguiendo e desaroyo na Merca cu ta stipula cu entrante prome di augustus venidero CDC (Center of Disease Control) na Merca ta introduci un maneho nobo pa admision di cacho.
E maneho nobo ta stipula cu tur cacho cu bay Merca mester ta:
o Minimo 6 luna bieu
o Tin tur vacuna incluyendo di rabies
o Mester tin microchip
Esaki ta nifica cu e cantidad pronostica di 2000 puppies no lo por bay Merca prome cu nan yega 6 luna di edad despues di prome di augustus venidero. E resultado di esaki lo ta negativo pa Aruba si no actua di awo.
Mirando cu lo tin cu bay experiencia un crecemento acelera di e populacion di cacho cu ya caba ta atendiendo cu ne. Y ta pronostica cu mayoria di esakinan lo por wordo bandona rond di Aruba.
Pa e situacion aki no yega asina leu, a sinta cu stakeholders importante pa yega na un plan di accion y mitiga e impacto aki. Seguramente cu e obhetivo pa mehora e bienestar di e animalnan na Aruba.
E plan di accion ta consisti di un continuacion di e colaboracion entre e Ministerio cu e fundacionnan y otro stakeholders. Hunto lo ehecuta campañanan di sterilisacion y castracion den bario, cuminsando for di luna di juni. Microchipping tambe lo tuma luga durante e campañanan aki. Alabes lo enfoca riba campaña di conscientisacion pa e temporada importante aki.
Den e proximo simannan por bay mira diferente actividad tumando luga pa fundacionnan. Den luna di juni proximo lo bay cuminsa cu e prome campaña di sterilisacion den barionan cu tin mester di esaki.
Pa mas informacion tocante e campañan aki por acerca e fundacionnan of CCC (Centro di Control di Cacho) via nan pagina di Facebook.
Aruba su Ley Bienestar di Animal (Landsverordening Dierenwelzijn) ta den su etapa di inicio y gobierno ta pone esaki como prioridad p’asina nos por pasa e ley e aña’ki mes.
Esaki ta solamente e comienso di hopi otro actividad cu ta tumando luga pa mehora e bienestar di nos animalnan na Aruba y crea un ambiente mas consciente di nos animalnan.
