Minister di Naturalesa ta orguyoso di anuncia un ampliacion den su proyecto di agroforesteria sintropico, conoci como “Syntropic Agroforestry”. Den e proyecto tin 12 scolnan basico envolvi, promoviendo agricultura sostenibel y siguridad alimenticio bou di muchanan. Alabes, ta inclui Instituto Pedagogico Arubano (IPA) como un scol adicional pa guia docentenan riba e importancia di inculca e balor di agricultura den e siguiente generacion pa medio di e tecnicanan nobo di agroforesteria.
A selecciona e 13 scolnan a base di nan motivacion pa participa, tereno disponibel cu acceso na awa y coriente, y compromiso di nan mes pa contribui na e proyecto. E proyecto ta cuminsa 2024 y ta inclui varios tayer y plantamento di e matanan riba un diasabra di 7’or di mainta te cu 1’or di merdia. Den esaki lo invita mayornan y ciudadano den comunidad pa duna un man y aporta na e proyecto bunita aki como boluntario.
Ministerio di Naturalesa ta colaborando cu Santa Rosa y Living Soil unda muchanan lo tin e oportunidad di siña tocante agroforesteria y e mehoracion di calidad di tera y con por contribui na siguridad di alimentacion.
Den esaki lo tin tayer pa esunnan cu lo mantene e cunucu na e scolnan, pa nan por siña mas tocante e principionan di e tecnica, guia e scolnan den e proceso di plantacion di mata riba nan tereno, brindando nan cu material necesario.
Pa complementa esaki, IPA lo ta envolvi pa instrui nan docentenan den e tecnicanan di agroforesteria, introduciendo e enseñansa di sostenibilidad den nan curiculo.
“Nos ta masha entusiasma pa trece e 12 scolnan basico y IPA den e proyecto aki cu lo tin un impacto positivo tanto pa e hobennan como pa nos comunidad en general,” segun Minister Ursell Arends. “Pa nos, esaki ta un oportunidad pa cultiva no solamente tera, pero tambe conocemento y aprecio pa nos naturalesa.”
E proyecto ta un esfuerso colaborativo cu ta conta cu participacion activo di docentenan, studiantenan, y boluntarionan. Ministerio di Naturalesa ta kere firmemente cu e colaboracion aki por logra un cambio impactante pa fomenta agricultura sostenibel na Aruba. E proyecto ta planifica pa cuminsa su ehecucion na 2024.
