Minister di Finanza Xiomara Maduro no a keda mucho contento cu pregunta di reportero di 24ora.com Marko Espinoza si e no ta bende pueblo un 6 pa 9 riba e tema di Rijkswet. E pregunta aki a bini despues cu a confront’e cu e expresion di Secretario di Estado ALexandra van Huffelen cu no ta existi un Rijkswet “hibriede” pero simplemente un Rijkswet.
A puntra e mandatario con e ta tuma un declaracion asina di e politico Hulandes. Sinembargo el a prefera di no comenta riba loke van Huffelen a bisa. “Esey no ta su palabranan y abo mes lo mester puntr’e riba esey. Ami sa loke cu mi ta haci aki como trabou,” e mandatario a bisa e periodista Marko Espinoza.
Aruba, el a bisa, mester percura pa definicion di e Rijkswet, e parti di supervision y e trabou cu mester haci pa cumpli cu e normanan.
Puntrando e mandatario si gobierno ta papia di un Rijkswety “hibriede” y Hulanda ta papia di simplemente un Rijkwet, no ta purbando di bende e pueblo un 6 pa un 9, el a contesta lo siguiente: “Marko Espinoza laga mi bisa bo. Xiomara Maduro ta un hende cu ta serio den su trabou como Minister di Finanza den e pais aki.”
El a bisa cu ta hopi trabou positivo a haci, pa cual tin bon reaccion di Standard & Poor’s, Moody’s y IMF ta felicita pa e trabou haci, “y eseynan ta prueba kico Xiomara Maduro su trabou ta pa Aruba. Sigur no bende un 6 pa 9. Kisas ora cu mi bisa e berdad hopi no ta gusta. Nan no ta gusta ora bista esey. Mi ta haci un trabou serio y mi no tin ningun motibo pa bende un 6 pa 9. Ora e cos ta bon mi ta bisa bo y ora cu e no ta bon tampoco. Y mi ta splica bo na placa chikito con nos ta anda di un forma serio pa drecha e situacion na bienestar di pais Aruba.”
E no sa si e lo topa cu e Secretario di Estado saliente di Hulanda Alexandra van Huffelen. Esaki pasobra e no sa si e lo keda mucho dia na Aruba. Normalmente esun pa papia cu van Huffelen ta prome minister. Sinembargo e mandatario aki ta den exterior y tambe e vice-prome minister. Esaki ta nifica cu te cu diahuebs awo, mirando Ursell Arends ta den exterior, Minister Xiomara Maduro lo ta actua como Prome Minister di pais Aruba.
