Pa algun luna a organisa e Mision Comercial pa Surnam. Dia 24 di juni ultimo Minister Wever cu su delegacion consistiendo di Camara di Comercio, Departamento di Asuntonan Economico, ATIA y un total di diestres comerciante a sali rumbo pa Surnam.
Un biahe cu un programa intensivo unda cu Minister Wever a topa cu Presidente di Surnam, Chandrikapersad “Chan” Santokhi, pero tambe cu Minister di Economia, Minister di Transporte y Minister di Agricultura pa asina fortalece e lasonan comercial entre Aruba y Surnam. Durante e mision aki e comerciantenan a haya oportunidad pa topa cu comerciante nan di Surnam pa asina crea laso nan cu e negoshinan.
Pa culmina e mision aki, Embahador di Reino Hulandes na Surnam Sr. Walter Oosterbos a organisa un network event na su residencia. Aki Embahador a expresa su orguyo di por bira con Aruba y Surnam ta sondea activamente e posibilidad- y oportunidadnan den beneficio di ambos pais. Embahador Oosterbos durante su discurso a enfatisa cu e t’ey tambe pa Aruba ya cu e ta Embahador di Reino Hulandes y no solamente di Hulanda, pues cu e t’ey pa yuda Aruba y su empresarionan tambe. Embahador Oosterbos a invita hopi comerciante di Surnam na su residencia pa asina nan por a network cu e delegacion di Aruba.
“Mi ta hopi agradecido na e cooperacion cu nos a ricibi na Surnam”, Minister Wever a cuminsa ta bisa. “Nos a haya oportunidad di por a papia cu diferente stakeholders y mandatario den e corto tempo cu nos tabata na Surnam pa asina haci e prome stapnan pa sondea posibilidad y oportunidad pa haci e lasonan comercial mas estrecho entre Aruba y Surnam. Nos delegacion a wordo realmente bon ricibi y trata na Surnam y mi ta kere nos tur cu a participa na e mision comercial aki a keda satisfecho. Awo e trabou ta cuminsa.”
Minister Wever ta gradici Departamento di Asuntonan Economico, Camara di Comercio y ATIA pa organisa y uni den e mision comercial y tambe tur comerciante cu a compaña nan durante e mision comercial. Di e forma aki nos ta demostra cu hecho cu ora Gobierno traha hunto cu sector priva nos ta para mucho mas fuerte.
