Diaranson anochi Minister Ursell Arends a atende e prome evento di “Our Ocean Conference” na Panama. Minister Arends a participa na e evento di Blue Leaders, organisa pa Belgica, pa habri e Our Ocean Conference. E evento ta busca pa fomenta apoyo pa e tratado “Biodiversity Beyond National Jurisdiction (BBNJ)”, cu ta diseña pa proteha bida marino y recursonan den awanan internacional.
E evento di Blue Leaders a lansa un yamada pa tur pais pa “seal the deal” riba e tratado BBNJ, cu ta plania pa finalisa e aña aki. Implementacion di e tratado ta esencial pa preserva salud y productividad di nos oceanonan mundial, cu ta vital pa mantene bida riba nos planeta. E meta ta pa logra proteccion riba por lo menos 30% di oceannan mundial.
Como participante na e evento, Minister Ursell Arends a demostra e compromiso di Aruba y di Reino Hulandes pa conservacion di nos oceannan y proteccion di bida marino. Synergia y ambicion pa esfuersonan cu ta crea resiliencia di recursonan y biodiversidad marino lo beneficia comunidadnan rond di mundo.
