Diabierna e trahadonan di SABA a reuni den un manifestacion dilanti di Bestuurskantoor, p’asina expresa nan malcontento cu e situacion cu ta reinando den e casnan di cuido cu ta resorta bao di e fundacion aki.
Un di e puntonan aki ta e tema di recht trekking di cual di hopi tempo nan ta exigiendo algo di esaki y no tin claridad. A duna minister tur tempo y espacio pa haci un investigacion si ta berdad e placa a bay pa SABA of si gobierno ta esun cu debe e trahadonan aki.
NO TA CERA
E vision di Minister Ursell Arends, no ta pa cera e cas di cuido di SABA. El a menciona cu tin un necesidad grandi den nos comunidad p’e cuido pa loke cu SABA ta brinda n’e Adulto Mayor y como gobierno, mester sigui garantisa esaki.
Loke a pidi ta claridad con e fondo publico ta aloca y esey ta algo cu una bes nan bin na mesa lo keda para riba cu Arends tin di rindi cuenta na Parlamento di Aruba y na comunidad.
Cualkier fundacion cu ta haya fondo publico tambe mester ta responsabel pa rindi cuenta na gobierno p’asina e minister por haci su trabao.
E mandatario ta spera cu e discusion publico por termina y pa bay bek na mesa. E discusion publico, e discusion politico cu ta tumando luga, ningun partido lo sali gana. Ta momento pa yega na mesa. Durante e reunion di Ministerraad e lo informa di a apunta un comision pa yuda atende n’e puntonan aki y yega na un solucion.
