Diahuebs merdia, Minister di Husticia y Asuntonan Social Rocco Tjon, a bishita warda di polis na San Nicolas, pa asina combersa cu e personal y alabes mira e trabounan haci den cuadro di instalacion di e camaranan di siguridad na e wardanan. Dentro di poco lo bishita demas ward’i polis, pa asina brinda e debido atencion pa cu diferente proyecto cu tin andando.
Segun e mandatario, actualmente tin diferente proyecto chikito andando, pero cu ta sigur hopi importante pa e personal. Ta papia di proyecto cu tin di haber cu infrastructura, camara y access control cual pronto lo bay bira un realidad. Durante e bishita na ward’i San Nicolas, Minister Tjon a combersa cu e districtschef Young, kende a duna un rond leiding y a expresa kico tur ta e necesidadnan cu nan tin actualmente como tambe e prioridadnan di e personal. A base di esaki, Ministerio di Husticia y Asuntonan Social hunto cu alto mando di Cuerpo di Polis lo delibera con lo por percura pa haci inversionnan necesario pa por surpasa e retonan aki.
For di banda di Ministerio di Husticia y Asuntonan Social a sinta cu personal di bedrijfsvoering di recherche, algemene dienst como tambe di sectie bijzondere verordeningen, y a comunica cu ful e districtleiding. Manera ya a menciona na varios ocasion, un di e mensahenan cu a comunica na nan ta, cu tin e recursonan disponibel, pues ta importante pa haya e peticionnan na ora, pa por procesa esaki pa di e forma aki por percura pa adkiri e materialnan cu nan tin mester di dje.
Por ultimo, e mandatario a indica cu lo sigui bishita e otro wardanan, mirando cu tin diferente proyecto di limpiesa y iluminacion andando, cual ta hopi importante pa asina eleva siguridad. Ademas di esey, e proyecto di camara y di access control ta andando, pa amplia e siguridad pa personal.
