Vakantie a cuminsa cu problema den enseñansa y el a caba ainda cu mas problema. Prome tabata SPO, cu na final, e problema a keda mas of menos soluciona. Awo a toca turno na OAA, cu segun Juancho Rasmijn, docente di carpinteria na dicho scol, ta condena pa muri un morto natural despues di 60 aña, cu e minister como e culpabel di esaki. Y esaki ta lamentabel, el a bisa.
El a conta cu a informa e docentenan di OAA durante vakantie, cu nan no ta paga nan overtime, sino losse uren. Segun Rasmijn, ta paga nan solamente e dianan cu nan traha. Nan no ta paga nan, dia cu nan no traha. Por mira riba e kalender di e aña escolar nobo cu tin hopi dia di vakantie y hopi dia liber. “Logicamente bo salario no ta bay ta manera antes.”
E docentenan den OAA prome biaha a scucha di algo asina. Semper nan tabata cobra door den vakantie, dianan liber ta wordo paga. Esey ta un recompensa di parti di gobierno pa e esfuerso cu nan ta haci como docente, pa traha anochi. Hopi di e docentenan tin cu laga nan famianan na cas, laga parti social di famia atras, pa bin yuda traha na OAA.
Aworaki, nan a kere cu ta bin for di un vakantie alegre pa cuminsa cu un aña escolar nobo na OAA, yen di alegria, nan ta haya tipo di cosnan asina, cu ta haci cu e no ta atractivo mas. Dialuna awo, dia 2 di september, ora cu scol cuminsa, nan ta prefera di no bay scol. Nan ta prefera di keda atras, pasobra e sistema di losse uren no ta cumbini nan. E ta bay bira fastioso pa eherce e funcion eynan.
A pidi un reunion cu e minister encarga. A haya un momento cu minister, pero ta lamenta hopi cu durante vakantie, scol ta habri, no a tende nada. Te awe faltando algun dia cu scol cuminsa, ta tende tipo di cosnan asina.
A bisa e minister cu si no tende nada, logicamente dialuna e docentenan no ta start cu OAA anochi.
Ta trata aki di 50 pa 60 docente. Segun e Minister, no ta nan so ta cay bao di esaki, pero tambe MAVO anochi, Enseñansa pa Empleo, tur ta haya losse uren. A puntra e minister dicon a tuma un decision asina abrupto. E docentenan no a wordo avisa cu e aña escolar nobo aki lo bira asina, cu nan lo haya pago di losse uren. Si a avisa nan, hopi di nan lo tabata sa di antemano y lo a wak kico nan lo a haci.
E docentenan ta di EPB mes den dia y nan ta traha anochi tambe. Pa hopi tempo, nan a coopera, sacrifica nan oranan anochi, sacrifica hopi cos pa por a yuda OAA. Aworaki di repente ta haya e cos aki. A puntra e minister dicon no a bay den un fase transitorio, di un pa dos aña, en bes di tuma decision den un luna.
E docentenan a bay cu vakantie cu problema den enseñansa. Nan a bin bek scol y atrobe problema. E biaha aki ta e parti di losse uren pa enseñansa nocturno.
