Den e ultimo tempo, specialmente e prome dos simannan di april, tabatin un cantidad di tiramento cu a tuma luga rond di nos isla. A hasta haya huls benta rond. Pues, segun dato, a registra no menos cu diesdos caso den apenas diescinco dia. Mas cu claro esaki ta un situacion alarmante y preocupante pa cua mester adresa y busca solucion dibiaha.
Den un conferencia di prensa cu a tuma luga awe mainta na Bestuurskantoor, a puntra nos minister presidente, mr. Evelyn Wever-Croes tocante esaki y el a bisa cu e situacion aki sigur ta uno lamentabel, specialmente mirando tur e hobennan cu ta envolvi den esakinan y cu sigur tur esaki tin e atencion di e gobierno na mando. Wever-Croes a bisa cu el a combersa cu minister di husticia, Rocco Tjon, desde un principio y cu Tjon a inform’e cu nan ta hincando algun plan den otro pa adresa esaki.
Un dje problemanan primordial, segun Wever-Croes ta cu tin un problema serio di mucho hopi arma den nos pais y problema bou di e hobennan, cu a perde e perspectiva y ta bay den e mundo akinan. Pues, por papia di un problema di violencia y menos tolerancia. Pero esaki tin e atencion di e minister di husticia, segun Wever-Croes.
Segun el a sigui splica, Tjon ta finalisando e plannan pa adresa y mitiga esakinan pa e haci un anuncio. A menciona entre otro, e posibilidad di un entregamento di arma, cua tabata menciona den parlamento tambe.
Pa un cobertura completo, les abo siguiente edicion di TREMPAN.
