Awe mainta parlamento ta bini hunto pa trata presupuesto di Tourism Product Enhancement Fund pa aña 2024. Den cuadro di esaki tabatin algun pregunta cu e miembronan di parlamento a manda pa e mandatario.
E miembronan di fraccion di Raiz den Parlamento a bisa cu nan a tuma nota cu tin mas o menos 100 baki sushi cu lo pone e aña’ki na costaan di Aruba. Nan tabata kier sa cual compania / empresa a hata e contracto aki. Pero nan tabata kier sa di e mandatario con e proceso a bay.
Minister Oduber a contesta cu pa loke ta compra di e bakinan, a pasa den un proceso di RFP (Redquest for Proposal). TPEF a ricibi en total cuater proposicion, y a oferta ricibi for di Serlimar tabata esun cu mas ta cumpli cu e condicionnan poni.
E fraccion di Raiz tambe a bisa cu nan a tuma nota cu pa loke ta trata e gastonan di atraccion (code 4362.04) a subi cu Afl. 120.000,-. E miembronan aki tabata kier sa for di e mandatario si e gastonan extra aki ta pa e ploegnan nobo cu lo ta responsabel pa recoge y haci e bakinan ariba menciona limpi.
E mandatario ta confirma cu e aumento di e gastonan di 4362.04 tin di haber na e proyecto extra di e 100 bakinan di sushi. Mester amplia e cantidad di autonan di e team di TPEF pa cumpli cu e tareanan adicional cu tin di haber cu e 100 bakinan di sushi.
E mandatario a sigui splica cu e compensacion cu TPEF mester paga pa cada ploeg pa e servicionan brinda ta 900 bruto (incluso e gastonan pa deshaci di e sushi na SERLIMAR / Eco Tech, pago di belastingnan y demas primanan BBO/BAVP y BAZV pa luna.
Tambe nan tabata kier a haya un bista riba e debe y cobransanan pa loke ta 2023. Pero e mandatario a priminti cu e lo entrega nan durante e reunion di awe mainta.
Mirando cu no tin mucho pregunta haci, esaki probablemente lo bira un reunion cortico.