Cualkier progreso cu kier logra na beneficio di e trahado, e mester tin e enfoke y acercamento humano. Pa e economia ta exitoso, hende mester sigui gasta. “Pa hende gasta, e mester tin un entrada y impulso economico ta bini di e poder di compra y e miho porvenir di e trahado di futuro tambe. Pa esaki mester inverti pa forma e trahado di futuro,” Minister di Labor Glenbert Croes a bisa na final di e reunion di International Labour Organization (ILO) na Suisa.
Minister Croes ta sumamente gradicido na su colega Hulandes Karien van Gennip, di Asunto Social y Labor, y Embahada di Hulanda na Ginebra pa e bon cooperacion ricibi. E ta haya e cooperacion via e plataforma di Reino, algo fabuloso. “Nos diversidad ta complementa otro y hunto nos ta miho,” el a bisa.
E mandatario di Aruba a participa cu un delegacion na e di 112 sesion di International Labour Organization cu a tuma luga for di 3 pa 14 di juni. Diahuebs a keda inaugura e Global Coalition for Social Justice. ILO ta sponsor y promove un vehiculo mundial, pa sigura cu e desaroyo y progreso nobo y moderno cu ta bay impulsa na mundo, no ta laga ningun hende atras. “Nos mester percura cu e trahado no ta keda atras, cu su derecho como trahado wordo mira como un derecho humano . Derechonan laboral ta derecho humano … E ser humano den tur desaroyo keda un ser humano.”
E mandatario a enfatisa cu pa logra husticia social mester atende cu tur e temanan di preocupacion den e area aki manera “child labour”, desigualdad, pobresa, etc.
Den cuadro di esey a pidi e representante di Reino na Ginebra pa Aruba bira partner, den cuadro di Reino Hulandes, di e coalicion global aki pa husticia social. “E ta e caminda cu mundo lo cana,” e mandatario a duna di conoce.
Pa relato amplio lesa TREMPAN.
