Den un reunion publico algun siman atras, a bin dilanti pa coalicion pero ni tampoco oposicion kere den nos medio, 24ora.com, debi cu nos ta carece di etica y cu e notica presenta no ta di confia. Despues di e instruccion di minister-president y alabes lider di MEP, a sigui ministernan Rocco Tjon y Endy Croes cu ta nenga di duna transparencia riba nan maneho. Y desde awe, Minister Glenbert Croes tambe a uni na e grupo aki, cu no ta kere den brinda transparencia na pueblo. Ta bisa pueblo, pasobra e audiencia di 24ora.com ta esun di mas grandi na Aruba, cu mas of menos 150 mil siguido riba nos plataforma, tur dia!
REGRESA DI NAN BIAHE
Den fin di siman, varios minister a regresa for di nan biahe pa Hulanda y cu na nan yegada, no tabata kier a duna entrevista. Ta trata aki di minister Rocco Tjon, cu anteriormente a informa cu e lo no contesta ningun pregunta mas di 24ora.com y tambe Minister Endy Croes, cu no tabata kier a duna ningun declaracion na nos medionan.
MINISTER XIOMARA MADURO SI A CONTESTA
Di otro banda, riba e mesun avion y yegando di e mesun destinacion, Minister Xiomara Maduro si a atende cu nos, a contesta algun pregunta, manera mester ta, ya cu prensa tin su deber di informa pueblo di kico ta pasando. E no a bay den detaye di su logronan, pero a sigura cu e siman aki e lo tene conferencia di prensa y cu lo manda relatonan di prensa di su biahe.
PRENSA TA WATCH DOG PA PUEBLO
Mandatarionan sa lubida tin biaha cu ta deber di prensa pa cuestiona maneho di gobierno y asina informa e pueblo di kico ta pasando. Nos ta e “watch dog” pa pueblo y pa garantisa democracia door di tin un prensa critico y liber pa haci tur pregunta y cuestiona tur locual no ta mustra corecto.
MINISTER GLENBERT CROES TAMPOCO KIER TA TRANSPARENTE
Awe, durante conferencia di prensa di Minister Glenbert Croes, el a bisa di ta uni su mes na su colega-, amigo – y rumannan minister, di no atende mas cu 24ora.com y TREMPAN. E ta referi aki na tanto Minister Rocco Tjon, como Minister Endy Croes. Pero contrario na e ponencia di Minister Glenbert Croes, awe Minister Endy Croes si a contesta e preguntanan haci na su persona di parti di nos reportero. El a admiti cu e mandatario (nan) tin e deber di contesta e pregunta di prensa.
PROCURADOR GENERAL NO KIER A TUMA KEHO CONTRA PRENSA
Segun Minister Glenbert Croes, el a entrega un keho contra dos di nos directornan, Patrick Paskel y Nelson Speed Andrade, cu segun e mandatario, ta critic’e pisa. Pero, e maximo autoridad di husticia di Aruba a contest’e cu e no ta mira nada malo na e forma di critica y informa, cu mas bien e ta un satira. E minister mes a bisa cu e ta un estilo a la Radio Rochela den e temponan aya. Pero e mandatario no a sconde di no gusta cu den e noticiero di merdia, Enfoke, tanto Patrick Paskel como Nelson Speed Andrade ta haci burla y mofa di e politiconan, pa cual e kier a purba entrega un keho penal.
Na final Minister Glenbert Croes a acusa Andrade di ta den negoshi di narcotrafico di pisca y Paskel di tin clientenan VIP cu ta haya permiso di estadia na DIMAS den un solo dia. Segun Croes, tur esunnan cu tin man riba cabes di Paskel y Andrade lo cay. Pero e no a bisa di lo entrega keho riba e supuesto acusacionnan penal cu el a bisa di tin. Ta dun’e net un dia pa e entrega keho, sino nos si lo keha e minister di smaad y laster, pasobra ni Andrade ni Paskel no ta den ningun organisacion criminal, ni ta narcotraficante ni ningun di e acusacionnan serio cu e minister a haci publicamente.
