Den un reciente entrevista cu 24ora.com, Minister Geoffrey Wever a comparti detaye riba su prome bishita oficial na Paramaribo, Surnam. El a reuni cu varios minister y tambe presidente di Surnam, Chandrikapersad “Chan” Santokhi, destacando e oportunidadnan di cooperacion economico y comercial entre ambos pais.
Reunion productivo y sinergia den economia
Minister Wever a cuminsa su bishita cu un reunion cu e Minister di Economia di Surnam, caminda nan a discuti diferente reto y desaroyo comparti. “E reunion tabata hopi ameno y productivo. Nos a observa cu door di traha hunto nos por fortalece otro mutuamente”, Wever a comenta. El a resalta e importancia di intercambia informacion y stimula comercio entre e dos nacionnan. E sinergia y e boluntad di cooperacion di e Ministerio di Economia di Surnam tabata aspecto destaca den e reunion aki.
Intercambio den ambito laboral
Encuanto e Ministerio di Labor, Wever a señala cu, aunke e aliniacion no ta mes directo manera den economia, ta existi punto comun y oportunidad pa cooperacion. “Nos a scucha e retonan di e mercado laboral na Surnam y nos a comparti di nos. Tabatin un intercambio di idea riba con pa maneha e retonan aki y con nos por sigui colabora”, Wever a afirma.
Base comun den e sistema legal
Wever tambe a subraya e similaridadnan entre e sistemanan legal di Aruba y Surnam, locual ta facilita e colaboracion. “Aunke nos a separa di Reino Hulandes, e base di sinergia ta sigui presente. Nos sistemanan legal y fiscal ta similar, loke ta haci mas facil coopera,” el a splica. Surnam ta den proceso di reforma su codigo civil, basa riba e modelo di Aruba y ta uzando e mesun expertonan cu a yuda Aruba.
Encuentro cu presidente di Surnam
Un di e puntonan culminante di e bishita tabata e encuentro cu e presidente di Surnam, Chandrikapersad Santohki. “Tabata un privilegio representa Aruba den e reunion aki. Presidente Santokhi a mustra habri pa scucha nos proposicion y deseonan di mayor cooperacion economico,” Wever a indica. Presidente Santokhi a manifesta su interes den aumenta e lasonan comercial y mehora e logistica pa facilita comercio di producto fresco entre e dos paisnan.
Futuro bishita y colaboracion continuo
Presidente Santokhi tin plan di realisa un bishita oficial na Aruba na october, cu e obhetivo di concretisa e avancenan discuti durante e mision aki. “Surnam ta aprecia cu nos a bin cu un delegacion comercial. Aunke mi agenda ta mas politico, mi sa cu nos comerciantenan ya a establece contacto importante”, Wever a afirma.
Oportunidad den Turismo y Agricultura
Wever tambe a destaca e potencial di Aruba pa contribui n’e desaroyo di e sector turistico di Surnam, specialmente awo cu Surnam ta explorando oportunidad nobo den gas y petroleo. Fuera di esey, a trece dilanti e posibilidad p’e agricultornan Arubiano cultiva producto riba tera Surnameño. “Tin hopi area cu nos por traha hunto, probechando nos similaridadnan cultural y di idioma”, el a conclui.
Minister Wever a mustra optimista riba e futuro di e relacionnan entre Aruba y Surnam, confiando cu e colaboracion continuo lo trece beneficio concreto pa ambos pais.
