E decision di Corte cu no tin base pa a duna Natura (pa Embassy Suites) un aanlegvergunning pa construccion di un beach, tabata un setback pa e inversionista. Minister Geoffrey Wever ta kere cu den e siguiente paso e dos ministernan encarga mester dialoga cu e inversionista riba kico por bay haci.
E mandatario mes a duna di conoce cu prome cu el a asumi e puesto di minister, e tabata atende cu hopi inversionista. Semper e conseho cu e ta duna pa percura cu ta sigur di tur permiso. Y si tin promesa(nan) cu ta wordo haci, averigua cu ta cosnan cu nan por exigi pa haya den futuro. Esta den e sentido cu ta cosnan cu Gobierno lo no mester tin problema pa cumpli cu nan den futuro.
“Ora cu bo ta haci un proyecto di e indole aki, bo mester percura cu bo tin tur bo puntonan basico na ordo. Kico ta e permisonan cu mester y cu ta cosnan cu bo por exigi nan. Den e caso aki, segun e veredicto, ta para cu eynan no por bin construccion di un beach ya cu e ta violacion di ROPV.”
Awo mester bay mira kico ta e siguiente pasonan di e empresa. E no tin contacto cu e grupo pa sa ki nan ta bay haci. Echo ta cu no por duna permiso pa un beach eynan y ta un decision di corte. Gobierno, den e situacion actual, tin su mannan mara y mester cumpli cu ley.
Ademas di esey, mester tin bin dialogo cu inversionista, esta e desaroyado di Embassy Suites. E minister a bisa cu e ta spera cu e dialogo lo sigui hunto cu e ministernan cu ta directamente encarga cu e situacion aki, esta Minister di Infrastructura y Minister di Naturalesa. “Mi ta encurasha nan pa dialoga cu e desaroyado pa busca un forma con pa yega na palabracion.”
E preocupacion bou di conocedonan politico ta si e inversionista dicidi di haci un caso pa daño y perhuicio. Esaki pa motibo cu a haci un promesa y a resulta cu awo no por cumpli cu esaki. Pero e mandatario ta bisa cu el a scan e veredicto y e no ta mira algo cu lo por duna e inversionista un base pa un caso di daño y perhuicio. Hues a bisa cu no tin obligacion pa duna permiso.
“Esey ta algo cu ta un trayecto cu e ministernan mester dialoga cu e desaroyador di Embassy Suites,” ta loke Minister Geoffrey Wever a duna di conoce.
Pa un relato amplio, lesa TREMPAN.
