Minister Geoffrey Wever ta na cabes di un delegacion consistiendo di e representantenan di Camara di Comercio, ATIA, Departamento di Asuntonan Economico y varios otro comerciante Arubiano den un Mision Comercial na Surnam cu lo dura te cu dia 28 di juni. Durante e bishita aki, Wever a sostene varios reunion clave cu funcionario y empresario Surnameño pa discuti oportunidad di colaboracion y fortalece comercio bilateral.
Un di e puntonan destaca di e mision tabata e reunion cu e Minister di Transporte di Surnam. “Nos a combersa cu e directornan di e empresanan di transporte riba e posibilidad pa añadi un avion di carga n’e aerolinea nacional di Surnam. Esaki lo stimula comercio entre ambos pais, ya cu e conectividad ta crucial pa nos,” Wever a splica. E bishita tambe a inclui encuentro cu e companianan logistico y un bishita n’e waf di Surnam pa completa e combersacionnan strategico.
Wever a menciona cu ainda no a establece un cronograma specifico pa aumenta e vuelonan entre Aruba y Surnam of haci e orario di e aerolinea Surnameño mas flexibel. “E ta un proceso gradual.” Diahuebs atardi mes e tabatin un otro reunion cu gerencia di e aerolinea nacional y eynan por a discuti mas riba e posibilidad aki. Un avion di carga por stimula comercio, pero mester sigura p’e ta factibel y tin e volumen necesario pa hustifica su implementacion,” el a afirma.
E minister tambe a destaca e recepcion caluroso cu e delegacion Arubiano na Surnam, tanto di parti di e ministerionan como di e presidente Santokhi y diferente empresa. “E reunionnan B2B cu nos tabatin tabata hopi positivo. Ora cu bo prepara algo asina, bo tin un vision y ta spera p’e materialisa. Mi ta sinti optimista pa mira cu nos visionnan ta alinea y cu tin hopi oportunidad economico entre Surnam y Aruba,” Wever a expresa.
Pa culmina e mision comercial, a organisa un receptie n’e embahada di Hulanda, unda cu e delegacion Arubiano tabatin e oportunidad di interactua cu mas empresario Surnameño y explora ainda mas oportunidad di colaboracion. “E bishita tabata un bon escogencia y nos ta ansioso pa sigui traha riba e plannan aki y concretisa e oportunidadnan aki pa beneficio di Aruba,” Minister Wever a conclui.
E mision comercial aki ta representa un paso importante pa fortalece e lasonan economico entre Aruba y Surnam y ta priminti habri oportunidad nobo pa comercio y e colaboracion entre ambos pais.
