Dia 24 di augustus minister mr. Geoffrey Wever hunto cu Minister di Finanzas mr. Xiomara Maduro, a ricibi bishita di College Aruba Financieel Toezicht (CAft) y su secretariado. Meta di e bishita tabata pa elabora riba e proceso pa maneha e kapitaalinvesteringen di Gobierno di Aruba. E proceso aki ta encera un maneho structura pa evalua y selecta proyectonan di inversionnan via “kapitaalinvesteringen” anualmente.
Departamento di Asuntonan Economico, Comercio y Industria (DEACI) bao responsabilidad di minister mr. Geoffrey Wever a duna un presentacion riba e proceso di Kapitaalinvesteringen. Un proceso cu riba peticion di Directie Financien cu ta desaroya pa DEACI. Anualmente tur departamento di gobierno tin e posibilidad pa entrega nan peticion pa kapitaalinvestering na DEACI. Hunto cu Directie Financien cu tambe ta forma parti di e Investeringsevaluatie Commissie ta evalua tur proyecto ricibi riba criteria determina. Un criteria importante ta e vision, strategia y maneho di Gobierno di Aruba. Basa riba e evaluacion ta traha un lista di recomendacion di inversion cu prioridad. E lista di recomendacion di inversion cu prioridad ta manda como conseho na Ministerraad.
![](https://24ora.com/wp-content/uploads/2023/08/20230824_GBW_CAFT-04-1920x1278.jpg)
Tambe durante e presentacion a elabora riba e puntonan di mehoracion den e proceso actual. Un punto di mehoracion ta entre otro con pa capacita e aparato gubernamental pa asina facilita y agilisa e proceso pa implementa maneho di gobierno na un manera mas eficiente y efectivo. Pa 2025 ta premira pa digitalisa e proceso di entrega peticion pa kapitaalinvesteringen.
Importante ta cu prioridad di maneho riba termino largo ta determina pa asina aloca e fondonan disponibel tambe na un manera mas eficiente y efectivo cu un impacto duradero riba desaroyo di Aruba.
![](https://24ora.com/wp-content/uploads/2023/08/20230824_GBW_CAFT-06-1920x1278.jpg)
Durante e presentacion tambe a duna informacion riba e proyeccion economico pa 2023 y 2024. Segun e proyeccion economico di DEACI uzando e modelo marcoeconomico MARUBA, economia di Aruba lo crece den 2023 cu 10.1% den termino nominal y yega un balor di 6.5 miljard florin, y ta premira pa 2024 un crecemento di 4.6% den termino nominal y un balor di 6.8 miljard florin.
Minister Geoffrey Wever ta positivo riba e proyeccion economico, pero ta mira como reto cu e desaroyo economico mester ta mas basa riba un modelo economico cu ta inclusivo y ta beneficia tur ciudadano. Pa stimula e transicion pa un economia duradero y inclusivo cu participacion di tur ciudadano, Minister Geoffrey Wever a elabora riba e necesidad di ehecucion di e Nationaal Actieplan 2023- 2025.