Diahuebs 11 di januari minister di Asuntonan Economico, Geoffrey Wever a presenta den Parlamento di Aruba pa un OB relaciona cu desaroyo di Economic Outlook pa 2024/2025.
E mandatario ta bisa nos cu su ministerio ta enfoca riba cosnan diferente. Tin por ehempel un minister di Turismo enfoca riba tur desaroyo turistico, y ministerio di Asuntonan Economico su focus ta purbando awor na trece un otro diversificacion y otro desaroyo pa nos isla. Pa San Nicolas por ehempel, tin diferente iniciativa canando. Algun luna pasa a bisa cu Minister Wever a haya aprobacion di parlamento pa un miyon florin pa Oranjestad y San Nicolas. A cumpli cu esey na final di aña 2023 haciendo compras di klinkers cu ta parti di e proyecto cu lo bay desaroya. Dus e presupuesto a keda aproba pa tur e diferente cosnan cu tin cu cumpra awor, y lo continua di haci compranan necesario pa sigui na desaroya e proyecto.
“Pa drecha un area, haci e bunita, cu inversionistanan por bin bek, y pa San Nicolas tambe por wak cu tin desaroyo pariba di brug.” E mandatario a menciona tambe cu nan ta trahando riba un proyecto pa amplia e parti di tereno di refineria pa bin bek pa desaroyo economico pa San Nicolas. Pa cu esaki tin reunionnan tumando luga desde aña pasa cu diferente stakeholders, RDA, WEB, Elmar, DOW, DIP y tur stakeholder importante. “Nan ta haciendo analisis y calculacionnan pa nos por wak con nos ta bay trece e parti di e tereno aki bek, pa nos por habri caminda pa yega lama. Esey t’e vision cu nos tin pa conecta centro di San Nicolas cu lama, y crea asina un perspectiva completamente nobo pa San Nicolas.”
Den e parti aki tin hopi potencial y gobierno ta kere cu lo tin hopi inversionista interesa, pero e lo bay completamente diferente pa San Nicolas. 2024 ta un aña cu lo dedica hopi tempo na San Nicolas segun Minister Wever. E siman venidero lo tin conferencia di prensa unda lo anuncia un simposio pa San Nicolas, otro proyectonan cu tabata den preparacion for di aña pasa y aworaki lo cuminsa mira luz di dia.
Cu of sin hotel, e desaroyo na centro di San Nicolas tin cu sigui. A puntra e mandatario si mas hotel den San Nicolas lo por ta un solucion n’e problema cu tin di desaroyo economico na San Nicolas. “Mi no ta kere den mas hotel na Aruba. Mi ta kere Aruba ta yen.” E mandatario ta bisa cu tin hopi hotel cu awe ta den construccion cu e ta haya nunca mester a aproba. “Mi ta kere si cu pa San Nicolas e concepto mester ta mas diferente, poco mas enfoca riba cultura, riba autenticidad,” segun minister Wever. E mandatario ta finalisa bisando cu den e cuadro ey bo por enfoca riba Boutique hotels, cosnan mas chikito y personalisa, algo cu tin mas curason y alma. “Esey mi ta kere mester ta e enfasis pa San Nicolas.”
