Awo cu e ley nobo di AFTA a drenta na vigor, Minister Wever, huntu cu Maria Dijkhoff-Pita, directora di Departamento di Asuntonan Economico (DEZHI), y Filomeno (Roly) Sintjago, Presidente di Raad van Bestuur di AFTA, a biaha pa Hulanda pa reuni cu e expertonan di e Ministerio di Asunto Economico Hulandes y Autoriteit Consument en Markt (ACM) na Hulanda.
ACM ta e AFTA di Hulanda. E meta ta pa prepara leynan nobo pa proteccion di consumidor bira un parti di trabou di AFTA.
Banda di AFTA su responsabilidad pa regula competencia husto, pronto lo inclui tambe Proteccion di Consumidor dentro di e responsabilidadnan di AFTA. Intencion ta cu pa 2025 AFTA lo tin e responsabilidad adicional aki pa regula y informa riba tereno di proteccion di consumidor, educando consumidornan riba nan derechonan y proteha nan contra practicanan inhusto den comercio.
Pa ehecuta e biahe aki ta conta cu presencia di directora di DEZHI, Maria Dijkhoff-Pita y tambe Presidente di Raad van Bestuur di AFTA, Sintjago, pa reuni cu e expertonan di Authoriteit Consument en Markt, como tambe ministerio di asuntonan economico di Hulanda.
“Entre otro nos lo cuminsa prepara e ley pa proteccion di consumidor, como tambe regla e funcionamento di AFTA y e rol di e minister di asuntonan economico di Aruba”, minister Wever a menciona. “Doing business na Aruba lo ta mas fair pa tur consumidor pero tambe p’e comerciante”, segun e Minister Wever.
Bishita e webpage di www.AFTA.aw y haya sa mas di kico Aruba Fair Trade Authority (AFTA) ta encera.
