E siman aki a tuma lugar un conferencia grandi di turismo Aruba, organisa pa Aruba Tourism Authority (ATA) titula ‘Global Travel Conference’, un conferencia unda tur tres socio di mas grandi den nos mercado di turismo a keda invita.
Minister di Salud Publico y Turismo, Dangui Oduber ta splica cu e tabata sigur di un bunita mainta caminda tabata tin diferente presentacion pa medio di CEO di ATA, Ronella Croes.
E intencion di e conferencia aki ta p’asina por showcase Aruba, duna mas informacion riba importancia di turismo pa Aruba, kico tur e isla tin di ofrece. “Pa asina nan yuda nos bende e producto Aruba, cual ta un producto di calidad.”
E mandatario encarga cu turismo ta bisa cu e enfasis ta riba ‘Low Volume/High Impact’ riba e turista influyente, e mercado Niche y turismo di calidad cu ta laga hopi placa atras den nos economia. “Sra. Croes a duna un splicacion cu por considera aña 2023 manera e miho aña pa loke ta trata nos turismo. Tur e indicadornan ta indica esaki, e calidad di bishitantenan, e ocupacion di hotelnan, e tourism receipt cu ta uno hopi importante pa midi e cantidad di turista cu ta bini nos pais. E cantidad di placa cu nan ta laga den nos economia. Sigur e tabata un mainta fructifero, “ segun minister Oduber.
