E minister ta contradici su mes si bo mir’e bon. Embassy Suites ta pasando dolor di cabes cu gobierno pa ricibi autorisacion for di Minister Ursell Arends pa sigui cu construccion y trabounan pa desaroya un beach dilanti nan hotel.
Ta despues cu e propio gobierno di MEP a otorga nan tur tipo di permiso pa construi un beach cu no t’ey. Pero di otro banda, e Minister di Integridad y Naturalesa, Ursell Arends, kende t’e junior partner di e coalicion di MEP-RAIZ, kier mustra su poder y ta haciendo dificil pa un otro tipo di permiso pa e construccion por sigui. E minister y su amigonan ta preocupa cu algun yerba cu tin den cercania, ta yam’e Yerba di Caña.
Mientrastanto, Embassy Suites ta keto bay wardando contesta di e minister. E minister no ta contesta ni riba nan peticion y tampoco obhecion.
Cos a bolter diabierna anochi ora a mira trabou cu ekipo pisa riba beach blanco dilanti di Divi Resort. Ey si e minister no ta cuestiona y sali na defensa di naturalesa. Ta parce cu Divi Resort tin un miho entrada cerca e minister compara cu Embassy Suites.
E movecion cu trucknan pisa riba beach cu tur e consecuencianan cu e por tin cu ne, ta demostra claramente cu na Aruba ta midi cu dos midi. Depende ta ken ta para cla pa activa. Ta conoci cu constantemente ta haci trabou di plama e beach eynan ora lama recobra parti di e beach. Esey no ta e punto. E punto si ta cu tur hotel ta haci mescos, pero un specifico ta riba e “lista preto” di e mandatario.
