Minister di Hustisia, señor Quincy Girigorie a firma kontrato na nòmber di gobièrnu ku e kompania lokal di telekomunikashon UTS, komo e kompania ku lo sòru pa transmishon di señal di kámaranan di vigilansia.
Esaki ku e meta pa alsa seguridat di komunidat i duna Kuerpo Polisial di Kòrsou un instrumento mas pa kombatí kriminalidat i influensiá komportashon di nos komunidat. Despues di a hasi pruebanan ekstenso ku dos kompania lokal di telekomunikashon, gobièrnu a hasi eskoho final pa UTS komo e kompania ku lo fasilitá e vigilansia na diferente partinan di Kòrsou ku e kámaranan.
Espektativa ta ku denter di seis luna lo konektá e kámaranan ku e kamber di monitor di polis. Lo bini un kantidat di kámara muchu mas grandi ku e kantidat aktual di 33 kámara. E logro aki lo kontribuí na hisa e vigilansia públiko i e kòntròl riba tráfiko. Lo amplia vigilansia manera planeá den fase 1 i 2 na diferente di puntonan stratégiko di Kòrsou.
Ta trata aki entre otro di áreanan banda di 16 punto di kòntròl na lusnan di tráfiko i den kayanan esensial ku tin hopi trafikashon di outo. Lo pone tur señal riba un ret spesial dediká na e proyekto ku tin un grado haltu di kalidat i seguridat. Segun planifikashon, na kuminsamentu di 2019 lo finalisá instalashon di tur kámara. Minister di Hustisia, señor Quincy Girigorie ta hopi satisfecho ku e stap aki, sigur mirando ku ya e kámaranan aktual ta dunando resultadonan positivo entre otro den solushonamentu di kasonan penal. Pues awor ku ta amplia e kantidat di kámaranan, Polis lo haña aun mas tantu bista riba kaya.
