Diabierna 14 di juni Minister di Husticia, Shalten Hato, a haci un bishita na Wardacosta Region Caribe Hulandes i Militarnan na Corsou. E bishita aki tabata dirigi pa por obtene un bista mas profundo den operacionnan i retonan cu cual ambos organisacion diariamente ta keda confronta.
E Minister a ricibi un bonbini na Base di Marina na Parera di Comandante di Forsanan Naval den Region Caribe y alabes di Director di Wardacosta, Walter Hansen y di Director Suplente di Wardacosta, Joëlle de Jong-Mercelina.
E dia a cuminsa cu un programa extenso na Wardacosta. E meta di e bishita tabata pa duna Minister Hato un bista di e tareanan diario di Wardacosta, entre cual, combati actividadnan ilegal riba alma, (tal manera contrabanda di droga i transporte ilegal di persona), operacionnan di buskeda y emergencia, y salvaguardia nos ambiente maritimo. Na e momentonan aki Wardacosta ta tratando un proyecto di transicion, cu aña binidero lo zorg pa mas o menos 40 cupo nobo di trabou.
Minister tambe a haya e oportunidad pa participa na diferente actividad di deporte cu Personal di Wardacosta, pa experencia e importancia di condicion optimal fisico pa e trabou aki. Minister a expresa su aprecio pa e dedicacion y profesionalismo di e personal di Wardacosta. El a enfatisa e importancia di nan labor pa siguridad nacional.
Tra’i merdia Minister a move den helicopter di Wardacosta pa bay riba e tereno di ehercicio militar na Wakawa. Aki Comandante di Militarnan di Corsou a ricibie, den persona di Capitan Sicni Meulens. E programa tabata encera un presentacion di e programanan militar y di entrenamento actual, cu ta enfoca riba garantia di siguridad y stabilidad den region.
Minister a asisti na un practica militar y a haya e oportunidad pa papia cu e militarnan tocante nan experencia y e retonan cu nan ta confronta den nan trabou. Minister a enfatisa den su speech e importancia di cooperacion entre e diferente servicionan di siguridad. Tambe el a expresa su aprecio pa Militarnan di Corsou y a subraya e importancia di un mayor profesionalisacion di militarnan di Corsou.
