Minister Dangui Oduber recien a dicidi di haci un bishita na e oficina di ATA na San Nicolas. Miho conoci como e Visitor Information Center, e oficina aki tawata un prioridad pa e mandatario aña pasa pa dune su “state of the art” new look and feel.
E Visitor Information Center na San Nicolas ta di vital importancia pa movecion di Turismo y brinda informacion na turistanan. E oficinanan aki tawata cera pa mas cu 1 aña y mey y manera tawata tin cambio di gobernacion, conforme maneho di Minister Dangui Oduber a dicidi pa renoba y activa e oficina di Turismo na San Nicolas.
Despues di un par di luna funcionando den su bachi di renobacion e oficina den luna di November y December a conta cu mas di 750 bishita di turista. Cada luna e cantidad di bishitante ta keda crece y bira mas hopi y esaki ta demostra con importante e oficina aki ta pa Turismo na San Nicolas.
E oficina ta fungi como e curason y centro di informacion pa turista na San Nicolas unda nos bishitantenan por disfruta di “walking tours” y tambe por siña mas di nos dushi isla riba e televisionnan interactivo. Minister Oduber ta kere firmemente cu si añadi e instrumentonan corecto, un resultado exitoso so ta di spera. Esaki ta e caso cu e VIC unda cu hasta riba websitenan renombra turistanan ta laga nan bon comentario di nan experiencia na San Nicolas.
Danki na e vision di Minister Dangui Oduber pa cu e proyecto aki awe por wak mas movecion den San Nicolas. E mandatario lo sigui monitor e oficina aki di cerca p’asina por sigui innova y asina por sigui contribui positivamente na economia di pariba di brug. Turismo ta nos forsa y e driver principal di nos economia. Minister Dangui Oduber ta convenci cu e aña’ki aun mas turista lo bishita e oficina y esaki ta contribui na e desaroyo economico na San Nicolas.
