“Tin un luz na horizonte si nos sigui cu disciplina pa no tin mas caso positivo. Pa 5 dia consecutivo NO tin ningun caso positivo di Covid-19 na Aruba.”
Minister Dangui Oduber ta hopi satisfecho cu e resultadonan di e testnan di e ultimo 2 simannan. Aruba a hiba un strategia hopi agresivo di haci hopi test, identifica e casonan positivo tempran, isola e casonan positivo y percura pa tin contact tracing.
A crea un app pa tin miho control y supervision di esnan cu ta den quaraintaine. Tur esaki a haci pa por flatten the curve y maneha e transmision.
Gobierno a tuma varios medida manera lockdown, toque de queda y shelter in place pa reduci e plamamento di covid-19 den e comunidad. “Nos hendenan a demostra un disciplina e ultimo simannan y esaki tawata un esfuerso en conhunto. E no tawata facil pa mantene tur hende paden pero nos a hacie pasobra nos a pone salud di nos hendenan na prome luga. Sin salud no tin bida y sin bida no tin economia.”
E ultimo 5 dianan Aruba NO a conoce NINGUN caso positivo nobo y e ultimo 15 dianan apenas 8 caso positivo.
Tin mas persona recuperando cu ta test positivo. Actualmente tin 74 persona a recupera totalmente y tin solamente 25 caso activo mas.
“E ta bayendo hopi bon y nos tin cu tene disciplina un rato mas pa nos por bisa cu Aruba ta venciendo Covid-19.
Na mes momento nos tin cu prepara nos mes pa e “normal nobo” te ora e vacuna pa Covid-19 yega. Tanten no tin vacuna nos mester tin e disciplina pa na tur momento mantene distanciamento social, tene cuenta pa laba man frecuentemente, bon higiena y hiba un bida mas saludabel.
Un biaha mas Gobierno kier a gradici tur pero tur frontliners cu ta riba pia desde e prome caso, bao di hopi tension y presion pa yuda Aruba.”
Nos ta contento cu nos ta avansando den e lucha contra Covid-19 y nos ta mirando e luz na horizonte. Pronto nos lo cuminsa reconstrui nos pais bek pa un futuro briyante pa un y tur.
“Nos ta arubianonan balente y orguyoso y apesar di e golpi cu nos a haya nos lo bini bek mas fuerte cu nunca.”
