Diabierna atardi Minister Dangui Oduber a efectua e gran apertura di (HOED) “Huisartsen Onder een Dak” den e bario di Piedra Plat. Esaki ta di dos localidad di dokter di cas opera pa Horacio Oduber Hospital (HOH) y e di dos cu a habri e aña aki.
Cas di dokter na Piedra Plat lo reenforsa e prome liña di cuido y trece mas accesibilidad na pashentnan cu mester di cuido y lo amplia e capacidad pa sirbi mas pashent.
E ocasion special aki ta nifica un paso padilanti den e compromiso di Minister Dangui Oduber pa mehora e calidad di servicio di cuido di salud disponibel riba nos pais. Den aña 2023 a firma un acuerdo di cuido, cual un di e temanan importante tawata pa reenforsa e prome liña di cuido. Asina ta demostra cu esfuerso continuo di tur den salud publico cu ta traha pa keda garantisa un bon calidad di cuido na Aruba cu innovacion y excelencia medico.
E maneho di Minister Dangui Oduber ta basa riba haci inversion continuo den cuido y pa sigui investiga con pa mehora e calidad di cuido y servicio na Aruba y alabes percura pa e fondo di AZV keda sostenibel. E enfoke di Ministerio di Salud Publico ta riba conscientisacion di prevencion den salud y pa e motibo aki cu e apertura di HOED na Piedra Plat lo tin tres dokter di cas pa ofrece un servicio adicional.
Minister Dangui Oduber ta gradici henter e team di HOH y AZV pa e bon trabou, dedicacion y contribucion di cada trahado. E compromiso di Hoed Piedra Plat ta pa sigura cu cada pashent cu pasa door di e portanan lo ricibi e miho servicio y trato medico, cu ta alinea perfectamente cu e vision di ministerio di salud, pa asina Aruba ta e pais mas inclusivo, innovativo y avansando den servicio di cuido.
