E siman aki tabatin un sentencia di Hof den un caso cu Gobierno a apela. Ta trata di e caso di pais Aruba, representa pa abogado Anthony Ruiz di e bufete Croes-Wever & Ruiz contra e Stichting Fundacion Lotto pa Deporte, Silvio Melanio Janga, Benvida Maria de Sousa, Antonius Aymon Kamperveen, Flavio Fernando Faneyte, Elias Juan Filomeno Kock.
E caso ta relaciona cu cambio haci net durante y despues di eleccion 2017, nombrando un Hunta di Supervision cu no tabata carga aprobacion di e Gobierno nobo di un otro asignatura. E fundacion semper tabatin solamente un directiva. E sistema aki tabata percura pa hopi metemento politico. E gobierno berde di e tempo ey a pidi pa trece cambio pa evita cu esaki por sosode den futuro. E sistema a cambia den sentido cu no solamente tabatin un directiva, apunta pa Gobierno, pero tambe tin un Hunta di Supervision.
Decision
Corte a destrui e decision di 3 di januari 2018. Nan a bisa di ta supone cu e cambio di statuut no a sosode di un dia pa otro y cu a papia anteriormente pa cambia e sistema.
No tin situacion cu a surgi despues di 3 di januari 2018, cu ta mustra cu e decisionnan tuma e fecha aki tin base. E entrada di un Gobierno nobo di un otro asignatura politico no ta motibo suficiente pa retiro di miembronan di Hunta di Supervision.
Gobierno no a bisa cu e cambio di Statuut y nombramentonan di 19 di october 2017 ta “nietig” debi na ordo publico. Di e decisionnan di 10 di januari 2018, Corte a evalua cu si bisa esun di 3 di januari ta nietig, e ora esun di 10 di januari tambe mester wordo destrui.
E Codigo Civil Buki 2 nobo a drenta na vigor dia prome di januari 2021. Pero e caso aki mester wordo huzga a base di e buki bieu. Den esey tambe hues por destrui decision di un minister si e ta un pugna cu loke ta husto y razonabel entre e fundacion, miembronan di Hunta di Supervision y e Minister. E regla aki ta mescos cu otro partinan den Reino. Y esaki a hunga un rol tambe den e decision di corte.
