Manera anticipa, Parlamento a yama un reunion publico y manera cu Minister Chris Romero a vocifera caba diabierna cu tin leynan existente cu tin pa respeta.
Esey no ta kita nada for di dje. A haya un tarea for di Parlamento pa bin cu un concepto di un landsbesluit, cual Minister Andin Bikker a traha riba dje y a present’e na Parlamento.
E mandatario a sigui splica cu pa algo asina aki tuma luga mas lihe posibel, mester bin cu un gedoogbeleid. No ta bisa cu ta un gedoogbeleid iresponsabel. Minister Bikker, for di basta tempo caba a yega di traha riba un concepto riba esey.
Algun cos mester ahusta. E minister ta gradici Parlamento pa haci esaki bira realidad. Ta bin cu un gedoogbeleid, mientras tanto ta traha riba e cambionan cu ta na caminda.
No ta keda ripiti e mesun cosnan, pero toch a resulta cu e pensamento cu a trece dilanti for di siman pasa diabierna, e realisa diahuebs y aki 10 dia, si tur cos bay bon, lo tin un gedoogbeleid, caminda cu tiradonan di pisca, lo por haci nan ofishi. Awendia por bisa cu den scarsedad di trabao, esaki por yuda nan beneficia nan mes y nan famia y tambe por ta cu aki 10 dia, tin un gedoogbeleid na su luga, responsabel y regula.
Por tende varios biaha cu no por bin cu algo pura, pasobra e no ta regula. Tin hopi cos na su luga caba. Kiermen aki 10 dia, tin un gedoogbeleid na su luga pa asina por duna tur e tiradonan di piscaun chens.
A dura 3 aña
Na 2001 caba un ley a pasa den Parlamento cu mester ta concorda cu tratadonan internacional. Na 2005 caba a purba di bin cu diferente concepto di landsbesluitnan caminda cu riba dje a haya diferente conseho.
Berdad por bisa cu Minister Romero tin casi 3 aña ta bezig cu esaki. Pero e realidad ta cu desde 2005, casi 20 aña ta bezig cun’e.
Dicon asina hopi
Tabata tin diferente pensamento, por ehempel entre e ministernan cu tin ta pro y contra. Pero awe por a wak e realidad con importante e ta. El a dura asina hopi pero danki na Parlamento cu a yuda pone esaki bira un realidad.
Ta spera cu mañan resulta cu bin gedoogbeleid, pero no mester bin a base di cierto cambionan den landsbesluit, e ora mester bay den un visserij verordening. E ora mester bolbe bay schakel in otro ministernan cu ta encarga cu esey.
Romero ta kere cu awe a demostra cu Parlamento di Aruba completo ta para pa bin cu un maneho pa permiti spearfishing.
