Diabierna mainta a tuma luga Conseho di Minister di Reino caminda cu tabatin varios punto di discusion. Un di nan t’e recorte salarial di 12.6%.
Segun Minister Plenipotenciario Guillfred Besaril, e reunion di conseho di minister tabata den un balans. E parti bon ta cu nan ta compronde e situacion di Aruba y ta duna e espacio pa loke ta e presupuesto, pa asina por traha cu e presupuesto pa loke ta 2022.
Tambe a yega na palabracion concreto pa loke ta COHO, cual tambe ta positivo. Loke si a keda ‘hang’ ta e recorte den salario, caminda cu tin diferencia di opinion. Hulanda ta keda para riba e recorte di salario y Aruba ta keda para cu no por keda corta y no duna perspectiva.
Ta bin cu un medida, pero semper y cuando cu ta brinda perspectiva y te na unda ta rek e liña, te unda ta cuminsa duna pueblo bek e espacio pa hala rosea.
No a yega na otro ainda. Por a mira cu Hulanda tin un otro manera di pensa, pero por lo menos e secretario di estado y otro minister di e gabinete nobo ta compronde y ta habri pa e discusion pa asina aki por yega na otro.
Nan tambe ta compronde cu esaki no por sigui pa mucho tempo mas.
Besaril ta sigui splica cu e knelpunten ta palabracion concreto. Hopi biaha ta papia hopi y no ta establece y poni di tal manera cu sa na unda ta bay precisamente.
Loke tabata haya hopi tabata cu tin palabracion, djey un siman of dos siman prome cu yega na RMR, diripiente ta bin algo adicional. Esey ta loke cu ta referi na dje cu no por keda rek e lastik mas. Mester haci palabracion cu di parti di Aruba, pero tambe di parti di Hulanda, mantene nan mes n’e palabracionnan ey pa por brinda perspectiva.
Awor aki kier brinda perspectiva pa nos pueblo, cu tabata sacudi hopi durante e pandemia den e ultimo dos añanan aki.
A yega ora pa duna e espacio pa nan por hala rosea. Esey t’e mensahe cu mester cuminsa drenta un poco den e pensamento di e gobernantenan Hulandes.
Pa un cobertura mas amplio lesa e edicion di TREMPAN di mañan.
