Recientemente durante un conferencia di prensa di gobierno, Minister di Transporte, Ursell Arends a indica cu e lista di prijs cu e taxistanan ta uzando no ta algo cu ta cuadra cu ley. E como minister di integridad, lo percura pa drecha e sistema y percura pa tur cos ta cana segun ley. Hasta ta teme cu locual ta haciendo ta ilegal.
No a dura mucho cu e taxistanan a reuni entre nan y dialuna mainta a sali cu un contesta mesora p’e minister. Pa cuminsa, a bisa e minister p’e tene cuenta cu su email y agenda. Tres biaha a pidi e minister pa reunion pa atende cu e tema di transporte publico y te dia di awe no a ricibi ningun contesta.
Segun Linda Orman, nan tin como cuarenta aña ta uza un lista di prijs. E lista di prijs tin un stampia di gobierno y t’un minister ta firm’e. “Si ta ilegal, ta tur hende mester donder op”, Linda Orman a comenta durante un entrevista cu 24ora.com. Ta dificil pa bisa cu un stempel di pais Aruba y un firma di un minister no ta reconoci y cu abo si lo traha den cuadro di ley. “Minister Arends mester cuminsa cumpli cu su palabranan”, tin hopi cos cu e minister ta haciendo cu no ta cuadra cu ley. Por ehempel un comision di ‘commissie’ cu tin cu instala kende cu tin duna conseho, sea si e minister pidie of no, esey no tin actualmente.
Tin hopi diferente punto cu tin cu tene cuenta cu ne, por ehempel tipo di permiso pa taxi, pa O-vervoer y mucho mas. Ta parce cu e minister kier ta stret pero e ora mester a cuminsa traha stret for di “day one”. E lista di prijs ta algo cu e taxistanan mes ta evaluando tambe, kier haci un cambio pa cu prijs pa cada zona. Nan ta cauteloso cu prijs pa sigura cu nan no perde e mercado cu tin eyfo.
