A haci hopi na Serlimar pero e rapport di Algemene Rekenkamer Aruba (ARA), Contraloria General, ta bisa cu ainda falta hopi. ARA a investiga seis empresa of fundacion di gobierno y den e parti di Serlimar a tuma nota cu gobierno ta uza e empresa aki pero no ta haci pago.
E preocupacion di ARA ta basa riba e investigacion haci den e periodo di 2017 pa 2020 y, segun e mandatario Ursell Arends, el a traha duro pa saca Serlimar for di e Surseance van Betaling. Y a cuminsa regla pa gobierno cumpli cu su debernan pa cu Serlimar.
A pone bon cla den e cambio di maneho cu tur instancia di gobierno cu ta haci uzo di Serlimar, mester cumpli cu pago tambe. Esaki ta un problema cu a pone tras di lomba caba. “Serlimar mester opera manera un compania. Cual ministerio cu haci uzo di e servicio di Serlimar, lo haya un invoice pa cumpli cu e pago. Di e forma aki ta maneha e compania awo.”
E mandatario a bisa cu Serlimar tabata debe sector comercial rond di 7 miyon florin y Gobierno rond di 13 miyon di primanan cu nunca a entrega. Pero e maneho awo ta papia pa su mes, y e ta bayendo den bon direccion.
Serlimar
Den e rapport di ARA ta para cu e investigacion a mustra cu e persona huridico publico cu a selecta pa e bira, den practica no ta cumpli cu e responsabilidad legal.
E ultimo cuenta anual cu nan tin entrega, cu a constata durante e periodo investiga di 2017 pa 2020, ta esun di 2016. Despues di esey no a entrega mas cuenta anual.
Servicio di Limpiesa di Aruba (Serlimar) tabata anteriormente un departamento di Gobierno cu entrante prome di juli, 2005 a independisa. Esaki a sosode via di un decreto gubernamental y a bira Servicio di Limpiesa di Aruba.
Gobierno a scoge pa un “publiekrechtelijke persoon”, sui generis.
