Den fin di siman, e partido berde, esta AVP a tene un accion di limpiesa den e bario di Dakota. A haci un yamada n’e bario pa bin deposita nan sushi sin ningun costo y e partido mes lo percura pa baki di sushi etc. A nota e lider hunto cu un grupo di simpatisante y candidato cu saco di sushi den man ta yuda cu recoge sushi den e bario. Segun Eman, Aruba ta birando mas sushi cu nunca y ta necesario p’e partido di pueblo Arubano, sali y percura p’un solucion.
No a dura mucho cu minister encarga cu naturalesa, Ursell Arends, a comenta riba e accion. Na prome instante, e minister a haya e accion uno di buena fe, mirando cu na final, ta na nos tur pa mantene Aruba limpi. Pero no ta usual cu contricante politico ta gaba otro. Su tras, durante tratamento di presupuesto supletorio den Parlamento di Aruba, e minister a comenta cu AVP te cu dialuna no a trece e baki di sushi nan cu a nan piki den bario di Dakota n’e sitionan destina pa procesa e sushi.
Manera ta conoci, actualmente tin diferente compania encarga cu desperdicio di sushi na Aruba. Ora di green waste ta bay cierto caminda, metal cerca otro, hero etc. En fin, e mandatario a sigura cu AVP no a trece e bakinan di sushi, pa cual e ta spera cu nan no a dump e sushi den dumpnan ilegal rond di Aruba. Ta cuestion di keda pendiente p’e lider di AVP, p’e confirma y comenta unda a tira e sushinan cu a piki den e barionan.
