Tabatin basta incertidumbre den seno di Cuerpo di Bombero pa cual ta material nobo. No a tende nada mas tampoco riba e investigacion andando pa loke ta e cuater personal cu ta suspendi.
Riba esaki, Minister di Husticia mr. Andin Bikker, durante un conferencia di prensa diabierna, a menciona cu Cuerpo di Bombero tabata un luga di abandono completo cu a hereda.
Tin como 29 punto cu sindicato SINBA a pone na atencion di e ministerio di husticia, como tambe gobernador y a atende cu mayoria di nan, segun e minister.
El a menciona tambe cu DOW ta trahando pa optimalisa e infrastructura.
E minister a agrega cu a manda un comision algun siman atras cu a bay Merca pa bay wak tres auto completamente nobo. Durante conseho di minister di diabierna, a papia pa loke ta trata e financiamento di esaki, pasobra na final di dia ta aparatonan hopi costoso, riba 2 miyon di florin di inversion. E hecho financiero aki ta keda un reto, pero ta atendiendo cu ne. E minister a menciona cu aworaki tin un plan concreto pa esaki.
Di e 29 puntonan di preocupacion presenta, un gran mayoria ta atendi.
E ‘ademlucht toestel’, ora cu un bombero drenta den un candela, e mester tin su ekipo di oxigeno, sino e ta cay flauw. Mester a reemplasa e aparatonan aki na 2013. Aworaki cu cooperacion di otro ministernan unda cu no tabatin fondo, a logra ordo e aparatonan aki. E otro aparatonan ya ta na caminda pa Aruba, concluyendo cu e tematica conclui.
Pa loke ta trata e investigacion, e personal suspendi a bay corte y perde nan caso algun siman pasa. Esey ta sigui anda.
No obstante e retonan financiero y e pandemia, a atende no solamente cu Cuerpo di Bombero, pero tur e retonan cu a haya den husticia. Filosofia di e minister ta cu mester ta pa laga un luha miho cu a hay’e.
Pa cobertura mas amplio, lesa e edicion di TREMPAN mañan.
