E ultimo dianan aki, casi a base diario autoridadnan ta teniendo accionnan exitoso relaciona cu cuido di nos costanan. “E ta un esfuerso grandi, combina cu aumento den presupuesto, ekipo y hende, pa garantisa mas siguridad na nos costanan”, asina Minister mr. Andin Bikker a bisa awe mainta.
E ta referi na e accion combina di Radarkamer di Cuerpo Policial y Kustwacht cu a conduci na detencion di no menos di 14 persona cu di forma ilegal a purba drenta nos isla via boto.
E intensificacion di cooperacion entre Cuerpo di Polis, Kustwacht y Guarda Nos Costa, den un esfuerso pa sigui traha conhunto den un solo meta ta dunando frutanan palpabel. A promove y percura pa ekipo adicional pa Cuepo Policial, Kustwacht y Guarda nos Costa pa por tin mas control efectivo na costanan y riba nos isla.
No por keda sin menciona e logro grandi di reintroduci un radar y helicopter pa Cuerpo Policial por detecta botonan for di momento cu nan sali y drenta awa teritorial di Aruba. Mayoria bes autoridad ta wardando nan caba, hasta prome cu nan yega Aruba cu hende, cu droga, arma y hasta animalnan exotico, cu ta purba importa di forma ilegal.
Aunke cu tin progreso enorme den e organisacionnan y mas ekipo pa por sigui garantisa siguridad memey di un pandemia y retonan di salud y di un economia fragil, ainda e trabou no ta cla. “Nos ta trahando duro, tur dia, pa sigui cosecha logronan importante pa sigura cu nos ta mantene tur esunnan cu no por drenta den forma legal, pafo di nos isla. Aruba definitivamente no por carga e peso di e retonan socio-economico na nos pais bisiña. Nos ta un pais cu nos propio retonan”, asina Minister mr. Andin Bikker a termina bisando.
