Minister Plenipotenciario na Den Haag mr. Juan “Ady” Thijsen, a ofrece su perspectiva riba e liderazgo nobo na Hulanda y su posibel repercusionnan p’e isla.
Cu e formacion di e gobierno Hulandes nobo den su fase final, ta spera cu e candidato selecciona pa loke ta asunto di reino (Zsolt Szabo) lo huramente dia 2 di juli proximo. E candidato aki, nomina pa Partij voor de Vrijheid (PVV), a genera diferente expectativa y discusion, specialmente den tema sentisbel manera migracion.
Ady Thijsen a expresa su opinion
Thijsen ta considera cu cada candidato ta aporta na su propio experiencia. Si sigui noticia, el a compronde cu e candidato kier sigui cu e maneho ya implementa. Pa Thijsen, esaki ta un bon comienso. Den e audiencianan reciente, tur e presentenan a mustra disposicion pa contribui y continua cu e trabao. Naturalmente, esaki lo traduci den un plan pa mehora e situacion di e ciudadanonan Hulandes, loke ta importante pa tur.
E balor di democracia
Thijsen a enfatisa cu si uno ta kere den democracia, e mester respet’e: “E pueblo di Hulanda a vota y a duna su opinion y ta necesario respeta y duna na e oportunidad pa goberna,” el a señala. Na Aruba, ta traha cu tur partido, consciente di su papel y responsabilidad. “Nos na Aruba semper nos a traha cu tur partido y nos sa loke nos ta haciendo y unda nos ta para,” el a añadi.
Reto historico y postura politico
Durante e audiencianan, miembro di e partidonan GroenLinks y PvdA a recorda cu den pasado PVV a sugeri pa bende e islanan riba Marktplaats pa un euro. E historial aki a genera duda riba un posibel cambio den su postura, specialmente considerando cu e Prome Minister ta un persona sin hopi experiencia politico.
Riba esaki, Ady Thijsen a indica cu Hulanda tin un historia di traha cu tecnocrata. Den e caso aki, e prome minister ta uno y Thijsen no ta kere cu esey ta un problema pa Hulanda, ni cu mester biba den pasado. Desde 2005 el a traha cu hopi figura politico. “Partido PVV tambe tin un trayectorio largo y a participa den varios tema, ofreciendo nan opinionnan. Tin biaha nan tabata hopi critico, pero nan mensahe principal ta cla: “Nos no kier pa pidi nos placa constantemebte y nos kier pa tuma responsabilidad.”
Responsabilidad financiero di Aruba
Aruba semper tabata responsabel, financiando a traves di e Internationaal Kapitaalmarkt, cu excepcion durante e temporada di COVID, ora cu a yega na un acuerdo cu Hulanda pa sobrevivi. Thijsen a subraya e importancia di wak padilanti. “E pueblo ta scoge su representantenan y awo mester demostra cu nan bal. Mi ta confia den e continuidad di loke nos a haci.”
Reconocemento y gradicimento n’e funcionarionan
Thijsen a felicita y gradici e funcionarionan nobo den nomber di pueblo di Aruba. Specialmente el a destaca e ex-secretario di estado Alexandra van Huffelen, kende publicamente a expresa su confiansa na Aruba y a rechasa e creacion di un COHO, afirmando su fe denj e capacidad di e isla. Prensa Hulandes tabata critico, pero el a mantene su posicion y a expresa su confiansa den e isla, Thijsen a indica.
Relacion futuro y confiansa mutuo
Thijsen tambe a expresa su gratitud pa Mark Rutte, kende a hunga un papel fundamental den politica Hulandes durante hopi aña. “Mark Rutte, kende m’a conoce desde tempo cu e tabata lider di VVD y despues como prome minister tabata un figura clave den maneho di reino. Nos a traha hunto durante e proceso di desmantelacion di Antias y den e reforma di e statuto. Awo como secretario general di NAVO, e ta enfrenta un tarea crucial den un momento di desafio global grandi. Mi ta confia cu Rutte,cu su experiencia y liderazgo, por maneha e responsabilidad aki cu exito,” Thijsen a señala.
Resumiendo, Thijsen ta mira cu optimismo e formacion di e gobierno nobo y ta spera cu e relacion entre Aruba y Hulanda sigui desaroya di manera positivo y basa riba e responsabilidad comparti y respet mutuo. Den Reino mester biba cu confiansa y respet mutuo, Thijsen a conclui, subrayando e importancia di e cooperacion continuo pa bienestar comun.
