A proclama dia 3 di mei como Dia Mundial di Libertad di Prensa na 1993 p’e Asamblea General di Nacionnan Uni, siguiendo un recomendacion di e Conferencia General di UNESCO.
E fecha scogi pa coincidi cu e aniversario di e Declaracion di Windhoek, den cual e representantenan di e medionan di comunicacion Africano cu a participa den un seminario organisa pa UNESCO den e capital di Namibia, a crea un documento den cual a formula e principionan di libertad di prensa.
Trinta aña despues, e conexion historico estableci entre libertad di busca, difundi y recibi informacion y e bien publico ta sigui siendo mes relevante cu e dia cu a firma e declaracion di Windhoek.
Segun estableci pa articulo 19 di e Declaracion Universal di Derecho Humano, libertad di expresion ta un derecho fundamental: “Tur individuo tin e derecho di libertad di opinion y expresion; e derecho ta inclui e derechonan di no ta molesta pa motibo di bo opinion, investiga y ricibi informacion y opinion y e difusion di esakinan sin limitacion di frontera y mediante cualkier medio di expresion”.
Teniendo e derecho aki na cuenta, Dia Mundial di Libertad di Prensa ta un oportunidad pa recorda e gobiernonan cu ta necesario respeta libertad di expresion y pa refleha riba e problemanan di libertad di prensa y e etica profesional. E ta un oportunidad pa:
- Celebra e principionan fundamental di libertad di prensa.
- Evalua e situacion di libertad di prensa na mundo.
- Defende e medionan di comunicacion contra atentado riba nan independencia.
- Rindi homenahe na periodista cu a perde nan bida cumpliendo cu nan deber.
2023 TEMA: LIBERTAD DI EXPRESION COMO FORSA IMPULSOR PA TUR OTRO DERECHO HUMANO
2023 nos ta celebra e di trinta aniversario di Dia Mundial di Libertad di Prensa.
Desde su proclamacion na 1993, nos a presencia tres decada di avance substancial den direccion di un prensa liber y libertad di expresion den henter mundo. E proliferacion di e medionan di comunicacion independiente den hopi pais y e introduccion di tecnologia digital a permiti liber circulacion di informacion.
Sinembargo, libertad di e medionan di comunicacion, siguridad di periodista y e libertad di expresion ta sufre cada biaha mas di atake, loke ta impacta e cumplimento di otro derecho humano.
Comunidad internacional ta enfrenta multiple crisis: conflicto y violencia, desigualdad socioeconomico persistente cu ta causa migracion, crisis ambiental y e retonan p’e salud y bienestar di hende den henter mundo. Na e mesun momento, desinformacion y informacion erroneo ta aumentando tanto online como den otro medio, cu repercusion grave pa e institucionan cu ta sostene democracia, e estado di derecho y e derechonan humano.
Precisamente pa contraaresta tal situacion critico y menasa, libertad di prensa, siguridad di periodista y e acceso na informacion, e libertad di expresion mester ocupa un lugar central. Consagra den articulo 19 di e Declaracion Universal di Derecho Humano, e derecho di libertad di expresion ta un rekisito previo y e forsa impulsor pa por eherce tur otro derecho humano.
E celebracion di e di trinta aniversario di Dia Mundial di Libertad di Prensa e aña aki ta un yamada pa pone central e libertad di prensa y tambe medionan di comunicacion independiente, pluralista y diverso, como factor clave pa disfruta di tur demas derecho humano.
- MENSAHE DI SECRETARIO GENERAL DI NACIONNAN UNI PA 2023
Durante tres decada, riba e Dia Mundial di Libertad di Prensa, comunidad internacional a celebra e labor di periodista y otro profesional den medionan di comunicacion.
E dia aki ta destaca un berdad fundamental: e libertad di nos tur ta depende di e libertad di prensa.
Libertad di prensa ta e fundeshi pa democracia y husticia. E ta haci posibel pa nos dispone di tur dato y informacion pa nos por forma opinion y bisa e berdad na e poder. Y manera e tema di e aña aki ta resalta, e libertad di prensa ta representa e esencia mes di e derechonan humano.
No obstante, den tur skina di mundo, libertad di prensa ta bou atake.
Ta menasa berdad pa desinformacion y e discurso di odio, cual ta trata di kita e liñanan cu ta demarca diferencia entre echo y ficcion, ciencia y teoria di conspiracion.
E concentracion creciente den sector di e medionan di comunicacion den man di algun y poco hende so, e ruina financiero di decena di agencia di noticia independiente y e mayor cantidad di ley y reglamento nacional cu ta sofoca periodista ta contribui solamente na amplia censura y ta menasa e libertad di expresion.
Mientras tanto, periodista y demas trahado den medio di comunicacion ta obheto di atake directo online y den otro ambito ora nan ta desempeña nan labor esencial. A bira custumber cu nan ta agredi, intimida, deteni y encarcela.
Diez aña pasa, Nacionnan Uni a establece un Plan di Accion tocante e Siguridad di Periodista pa proteha e profesionalnan den e medionan di comunicacion y pone fin na impunidad di delictonan cometi contra nan.
Riba tur Dia Mundial di Libertad di Prensa y esun di awe, mundo mester papia cu un solo bos.
No mas menasa ni atake.
No mas periodista deteni y encarcela pa via di nan trabao.
No mas mentira ni desinformacion.
No mas atake riba e berdad y esnan cu ta trece e berdad dilanti.
Ora periodista defende e berdad, mundo mester ta para na nan banda.
DIA MUNDIAL DI LIBERTAD DI PRENSA, SITUACION DI ARUBA
Rainbow Warriors Core Foundation ta lamenta cu Ministerio Publico a haci un mal trabou cu e caso penal Apollo pa busca e berdad y husticia pa e periodista asesina Poentje Castro. Y awor e caso a bay bek den lachi di cold case, siendo cu ainda tin hopi interrogante riba e informacion y dato di cual Ministerio Publico ta dispone.
Cu e situacion economico di Aruba ta bira casi imposibel pa periodista por eherce nan trabou independientemente, ya cu p’e medionan di comunicacion sobrebibi y adkiri entrada mediante publicidad busca e berdad, entre otro mediante periodismo investigativo ta birando cada bes menos.
E desaroyonan relaciona cu e unico medio di comunicacion na Hulandes Amigoe Aruba, un medio baluarte pa busca y bisa e berdad a mustra e vulnerabilidad di medionan di comunicacion na Aruba.
Por ultimo e hecho cu gobernacion na Aruba nunca a resalta den transparencia of ta completamente abierto den suministro di informacion na Staten, prensa of pueblo di Aruba, ta demostra e necesidad pa proteha y amplia e libertad di prensa y expresion.