Milton Ponson, presidente di Rainbow Warriors Core Foundation, a duna un comentario rib’e conseho di minister di Hulanda y vocifera riba e secretario di estado Alexandra van Huffelen, cu gobierno Hulandes no ta mira e necesidad pa mediante un ‘aanwijzing’ (un instruccion administrativo), forsa gobierno na Aruba pa tuma decision pisa, comokiera cu e secretario di estado van Huffelen a duna di conoce cu Aruba ta cumpliendo.
Ponson ta sigui comenta cu e decision di gobierno Hulandes ta indicativo di e maneho di e gobierno pa tur parti di reino. Pasobra e gobierno cu tin na Den Haag actualmente, no ta interesa den e impacto di e crisis cu tin den tur parti di reino. Tanto Hulanda, e islanan BES, Corsou, Aruba y St. Maarten pa loke t’e dolor cu e pueblonan di e seis islanan y madre patria ta pasando aden.
Ora gobierno Hulandes ta bisa cu no tin rason pa bin cu un aanwijzing, nan kiermen cu tur e cifranan y pa hopi analista cu conoce e materia, e presupuestonan di 2022 y 2023 ta comfabula, basicamente basa riba cifra cu no ta cuadra cu e realidad economico y e impactonan di factor fuera di nos control y alcance na nivel internacional riba e presupuesto particularmente e aspecto pa loke ta entrada di gobierno, mediante belasting, cobra den e sector di turismo, cu e gobierno Hulandes ta haya ta bon cu e cifranan ta klop.
Pero n’e mesun momento e gobierno Hulandes ta laga di desea pa loke ta forsa gobierno di Aruba pa corta den su propio vet y es mas, manera ta conoci y CAft a yega di bisa, gobierno tin cu corta den e aparato publico, corta den e sector cu yama ‘Diensten en goederen’, cual ta contracto lucrativo p’e companianan local suministra producto of servicio.
Hopi di nan pa loke ta servicio, ta consultant caro, hende cu gobierno, enbes di pone nan traha como ambtenaar, ta pone nan pafo cu contract comercial. E ultimo categoria cual ta subsidio na instancia den sector priva, fundacion cu ta presta servicio na gobierno, cu ta sirbi interes general.
Tur tres post aki riba presupuesto ta exageradamente halto, pero gobierno tin Hulanda ta haya OK. E cifranan te aworaki ta mustra cu ta keda den e norma pa loke ta e porcentahe di deficit riba e presupuesto di 2022 y 2023. Y Gobierno di Aruba por sigui bay.
Manera den pasado, un profesor de Vries cu tabata traha na Universidad di Aruba a yega di bisa cu gobierno Hulandes ta interesa solamente riba ‘aspecten boven de lijn’. Si presupuesto ta na ordo, no tin necesidad pa deal cu e temanan ‘beneden de lijn’, cu ta e causanan di gasto exorbitante y exagera den presupuesto, cu den caso di Aruba ta casi 100%, e corupcion y e nepotismo cu ta pone gasto bay halto di mas. Awo na Aruba, kico ta bay haci al respecto.
Segun Ponson, e consumidor su forsa di compra a bay atras, un averahe di 30%. Pero Directie Huur- en Consumentenbescherming, Directie Economische Zaken, ta kedando sordo modo. Hopi hende ta puntra kico a pasa di e controladonan di prijs di producto basico. Dicon e canasta basico na Aruba ta contene hopi menos cos cu na Corsou. Dicon cos esencial, manera azeta dushi, webo, yen di producto cu a subi den prijs. Por a mira un potret saca di un caha di webo na un supermercado grandi na un supermercado grandi, cu a yega 11,50. Pues e mesun caha di webo ey apenas 8 luna pasa tabata costa n’e mesun supermercado 3,50. E prijs a subi cu 8 florin, mas cu 200%. Esey ta conta pa mas di 60 otro categoria di producto cu a subi, entre 10 pa 50% y algun producto a subi hasta 100% den prijs. Webo t’esun cu a bati record, cu tin averahe di mas di 150% den subida di prijs.
Cheerleader di partido MEP, Marco Berlis ta bisa cu mester bin aumento di salario minimo. Pero si Centraal Bureau Statistiek ta bisa cu “bestaansminimum voor een gezin van twee personen” ta 4500 pa luna y “een gezin van twee personen met twee kinderen” ta 5500 per maand y dos salario minimo, cu si tur dos mayor ta traha, ta yega net na 3900, ainda falta 1600 pa cubri e buraco pa yega n’e bestaansminimum y cu aworaki forsa di compra a bay atras cu 30%, ta hamber nos lo bay pasa aki na Aruba.
Pa fin di aña mayoria di famia no ta bay tin ni placa pa cumpra ayaca. Nan lo tin cu bay come e mesun cuminda di tur dia, pasobra no lo bay tin placa pa festeha nada, pa cumpra nada pa Pasco, pasobra prijs a bira inalcansabel. Esaki t’e berdad duro di Aruba y ta puntra te ki dia e pueblo humilde di Aruba ta sigui guli manda abao. Ta bay yega un momento manera hopi otro pais, na unda of bo ta muri di hamber, of ta subi caya y bisa “ta basta”, tin cu caba cu e mal gobernacion na unda gobierno no ta pone e ciudadano su forsa di compra y su bienestar fisico y general central, manera a bisa na cuminsamento den e programa di gobernacion di e coalicion aki, cu ta uno di sinberguensa.
