Tin cifra di Departamento di Labor na Aruba ta mustra cu 83% di empresa ta chikito cu menos di 10 hende, ta loke cu lider di fraccion di AVP, Mike Eman a indica durante un entrevista den noticiero Enfoke awe merdia. Y ora papia cu e medida cu lo tuma contra di e director/accionista, un parti grandi lo bay touch tipo di negoshi aki.
Eman a traha den e trabao di notario pa hopi aña y a mira con hopi negoshi chikito a converti den NV.
E ta sigui splica cu den pasado Departamento di Impuesto mes ta conseha pa e negoshinan aki regla nan cosnan fiscalmente den un structura cu ta cumbini nan, cu nan a bira NV. Tin un parti hopi grandi cu tempo a bira un Vennootschap y ta p’esaki mes e medida aki ta conta, caminda cu e director/accionista ta bay hay’e ta paga un impuesto basa riba un salario ficticio.
Si mira e cifranan di locual esaki ta bay nifica y afecta, ta hopi mes.
2023 lo ta un aña dificil. Partido AVP awenochi ta organisa su final di e periodo dificil aki, drentando un otro dificil, cu un mensahe, cu kier comparti cu comunidad awenochi na Cas di Partido, caminda cu ta bin hunto pa no unicamente celebra un otro aña, pasobra tin di haci esey, pa malo cu e por tabata.
Nos tin di biba cu solidaridad cu esunnan cu ta sufri, cu esunnan cu a conoce perdida durante e aña aki. Nos conoce figura hopi conoci den nos comunidad cu nos a perde e aña aki y lo reconoce nan awenochi tambe, segun Eman.
Ta kere cu ta importante cu e legado di persona cu a traha den e mundo di telecomunicacion, di musica, di arte, den politica, a contribui na nos pais cu no mag di lubida nan, na momento cu nan cera nan wowo. P’esey awenochi lo reconoce nan tambe.
Mensahe di awe nochi ta: Ban forma un forsa di union grandi pa nos drenta 2023 decisivo pa no laga nos pais sigui biba den e pobresa aki pa nos supera e momento di miedo. Lanta para, si bo ta sindicato, si bo ta representa empleado, si bo ta representa pensionado, si bo ta representa comercio, no tin luga pa miedo mas den e pais aki. Pasobra si bo biba cu miedo, nan lo sigui trapa riba tur bo derechonan y ta momento pa nos tur asumi un curashi.
