Awe ta un dia special pa e parlamentarionan nobo, mirando cu nan lo huramenta y forma e constelacion nobo di parlamento.
Pero Mijenou Tromp di Stichting End Child Abuse y Grupo Ta Basta tin sigur algun palabra pa nan y pidi pa corda riba nan.
E kier recorda e parlamentarionan nobo pa loke tabata e manifestacionnan cu tabatin algun tempo atras. Nan a entrega varios manifiesto no solamente na parlamento, pero tambe na gobierno pa e leynan cu ta desea pa adapta, pa loke ta e maneho y castigo cu esunnan cu ta abusa di mucha ta ricibi.
E organisacion ta sinti cu ainda nan no a haya loke nan a pidi den e manifiesto. Ta pidi awo atencion di e gobernantenan cu pronto lo drenta den gobierno y tambe di e constelacion nobo cu awe mainta lo huramenta, un recordatorio pa e pasonan di loke tin cu sosode den e temponan aki, cu keto bay no ta atendiendo cu loke nan a pidi den nan manifiesto.
Tromp ta comenta cu aña pasa 3 di juli, a organisa un manifiesto di cual mas of menos 3500 persona tabata presente pa entrega nan peticion di 18 punto na parlamento, gobernador y gobernador.
Sinembargo a ripara cu e puntonan aki no ta hayando e atencion y prioridad manera debe ser. Por a nota cu a entrega un carta na gobernador cu tabatin 5 mil firma cu casi di biaha si a haya oido, pero nan carta entrega cu 12180 firma, ainda no a haya e atencion manera debe ser.
Pero si a duna atencion na peticion pa screening na tur politico manera debe ser, e asunto no lo tabata un problema mes.
Tur acto condenabel merece atencion y prioridad, no solamente asuntonan di corupcion, pero tambe asunto di abuso sexual di menor, cual ta un marca pa bida henter, specialmente cu door di nos sistema mes, no ta dunando e sosten y apoyo cu nan merece y tin mester di dje.
Ta Basta t’ey pa traha cu tur politico, parlamentario y minister cu tin bienestar di nos muchanan na prome luga y cu tin na bienestar na pecho y ta demostra esaki pa medio di nan accionnan. A entrega cinco carta cu diesocho punto y ta cla pa traha cu cualkier persona cu ta dispuesto pa traha riba dje.
Ta Basta y Stichting End Abuse no lo laga e asunto aki muri. Esaki ta bay ta un temporada cu tin cu corda pa motibo di e situacion financiero y economico, cual ta comprendibel, pero no por permiti cu mester poni un banda pa salba nos economia.
“Nos muchanan tambe ta nos futuro y si laga nan bay perdi, ta nos mes ta laga bay perdi asina,” ta loke Mijenou Tromp a menciona.
Pa cobertura mas amplio, lesa e edicion di TREMPAN mañan.
