Miguel Mansur, miembro di Parlamento pa Accion21, a biaha pa Hulanda pa participa den e reunionnan di parlamentonan di Reino. Y a pone hopi enfasis cu no ta Presidente di Parlamento, pero pueblo ta paga pa su biahe como parlamentario.
E reaccion aki a bini despues cu lider di delegacion di Aruba, mr. Edgard Vrolijk a señala cu Mansur ta miembro di e delegacion cu a bay Hulanda pero no a acudi na e dos prome reunionnan.
El a splica cu diaranson anochi cu e tabatin un otro afspraak. E biahe pa Hulanda, el a splica, tabata pa atende reunion di IPKO y e encuentronan aki ta cuminsa riba diabierna. “MI t’aki pa representa pueblo di Aruba y a haya varios invitacion pa reuni cu politiconan Hulandes. Tambe mi a haya invitacion di prensa Hulandes, a graba un podcast pa un media Hulandes. Mi a priorisa eseynan en bes di bay reunion di Tripartiet. Di e forma aki mi ta kere di a representa mi votadonan y Aruba di un miho forma.”
Pa loke ta Tripartiet e ta sinti cu ta tres stempelparlament a reuni. Mayoria di nan no por ni controla nan gobierno “corda crea plan pa cambia futuro”.
Y banda di e splicacion ey, e ta bisa cu esaki ta e di cuater IPKO den cual e ta participa, a bay Raad van State dos bes y a participa den diferente Tripartiet. Pa loke ta e representante di Aruba den Raad van State, ta un persona cu el a topa dos bes caba na Aruba.
Presidente di Parlamento mr. Edgard Vrolijk a splica cu den casonan asina, e no por haci nada. Pero tin un comision di Parlamento presidi pa Hendrik Tevreden, kende por hal’e aden pa papia riba su ausencia na e programa prepara pa e biahe pa Hulanda.
