Ta for di algun dia caba ta reina un impasse den e partido nobo Accion21. Inicialmente tabata core rumor cu Daphne Lejuez lo bandona e partido. Tabatin varios version ta core rond den pueblo, pero nada oficial. Awe den oranan di anochi, Daphne Lejuez, candidato number #2 riba e partido y tambe Leonardo Figaroa, candidato #14 a tuma nan retiro oficialmente for di e organisacion politico, Accion 21.
Tanto Lejuez y Figaroa a duna nan puntonan specifico dicon nan ta bandona e partido. Den un forma di sorpresa nos ekipo di 24ora.com a presenta na sede di Accion21 situa riba L.G. Smith Boulevard pa haya un prome reaccion di e lider. Den un forma exclusivo Miguel Mansur a conta cu, e retironan no a cay como sorpresa p’e, mas bien un alivio.
Ta net un rato prome cu e partijraad a inicia, Mansur a ricibi dos email for di e candidatonan, bisando cu nan ta tuma nan retiro.
Ni Lejuez, ni Figaroa a presenta na e partijraad. “Felicidad”, ta e sentimento di Mansur despues di tuma nota di e retironan, dicon, nos no sa. Pa awo, Miguel Mansur lo huramenta dia 8 di juli proximo como parlamentario. E ta e unico candidato cu logra saca su mes cu votonan preferencial pa drenta parlamento, cu un total di 2019 voto. Pa mas informacion, abona na Trempan.com.
