Durante un entrevista cu Miguel Mansur lider di partido Accion 21, e lider politico a mustra encuanto e mocionnan di cual su persona a abstene riba tur e mocionnan durante un reunion recien di parlamento. Aki ta trata di e mocion di MEP cu RAIZ y dos mocion di AVP. Mansur ta mustra cu a abstene riba tur e mocionnan door cu su partido tin un enfoke riba finansa y economia y kier ta responsabel.
E lider politico a mustra cu e realidad ta cu den parlamento no tin tur informacion di e cifranan. Na momento cu ta presenta un mocion esaki ta un deseo. Mansur ta mustra cu no sa kico e implicacionnan ta, pues sin e informacion aki no ta responsabel pa pone un voto pro of contra (voor of tegen).
Aki a duna un ehempel bayendo di historia cu antes na Aruba tawata haci uzo di sistema di cheque pa efectua pagonan, y despues a pasa over pa e sistema moderno di swipe cu ta funciona automatico, pues ora bo presenta e carchi, automaticamente e sistema electronico di banco ta confirma si bo tin e fondonan pa haci e pago.
E lider di Accion 21 a mustra cu ora wak partidonan cu ta bin cu promesa, aki e politico ta mustra riba cu tanto partido MEP y RAIZ ta mescos, ademas tur esunnan cu a bin cu mocion “pa parti cos y esey ta populismo, nan ta duna bo un cheque sin fondo”. “ Pa ningun hende den parlamento sea bo ta di coalicion of oposicion tawata sa si e fondonan ta exsisti pa cumpli cu e promesanan” segun Mansur.
E politico a agrega mustrando cu “ta haya cu pueblo merece miho cu esey, nan mester estudio”. Tambe cu por hisa e pension cu 50 porciento, pero pa hisa esey bo mester acorda e Rijkswet pa por baha e interes riba nos debenan.
Mansur ta mustra cu “e ora bo ta crea e fondonan pa bo pag’e, esey semper ta keda falta, nos ta bay haci esaki, pero nos no ta splica con nos tin planea pa crea e fondonan. A mustra cu por cuminsa refinancia na 3.4% y sigur 1 Biyon di e (fondonan) di e periodo di pandemia (Covid), bo lo por crea e 100 miyon cu lo mester cu asina por haci posibel pa duna 50% mas pa pension.
E lider di e partido liberal ta mustra cu tur e puntonan den e mocion ta importante, maske cu e politico algun biaha tin diferencia di opinion cu e lider di partido AVP con ta mirando e pueblo. Segun Mansur ta mustra cu e ta tende e lider di politico ta papia na varios ocasion cu e pueblo sufriendo, ta berdad cu 1/3 parti di e poblacion ta bibando cu menos entrada , a pesar cu e gastonan tey. Ta mustra cu “nos pueblo no ta un pueblo incapaz” Segun e politico di Accion 21 ta mustra cu mester empodera e pueblo pa medio di un economia cu ta funciona y “un gobierno eficiente cu no ta ‘distribi’ nan placa, pa nan ta exitoso”.
