Loke a sosode na Rijksministerraad ta lamentabel, ta loke cu lider di fraccion di Accion 21, Miguel Mansur a bisa durante di un entrevista diabierna. P’e motibo aki mes e fraccion lo ta mandando un carta pa Secretario di Estado Alexandra van Huffelen, cu copia di Eerste y Tweede Kamer y e comisionnan di relacionnan di reino. Si mira e argumento di e minister di finansa, ta por ehempel, aunke e gobierno a hisa su gastonan, nan ta insinua cu nan a contribui positivamente pa baha e deficit y e GDP ratio. Ta imposibel haci esey si a hisa gasto, cual t’e caso.
E argumentonan absurdo di e minister di finansa y e prome minister, a prevalece den RMR ta lamentabel. Esey ta algo cu sigur CAft lo ta pensa mesun cos. E unico di dos biaha den historia cu CAft ta recomenda un aanwijzing pa Aruba, ta increiblemente destructivo, echo cu e parlamentario lo indica esey na Van Huffelen. Ta di compronde cu e no lo kier conflicto cu gobierno di Aruba, pero esunnan cu ta sali perhudica di e falta di accion, t’e pueblo di Aruba.
Realmente awo tin un presupuesto 2023 cu ta keda manera e ta cu un deficit riba 100 miyon florin. Supuestamente tin cu produci un surplus di 60 miyon otro aña. E paso ta mucho grandi segun Mansur.
Como no ta haal finansa publico sostenibel e aña aki, esey no kiermen cu lo haal e otro aña, ni e aña despues, ilustrando cu e gobierno ta schuif e problemanan pa futuro.
Esey tambe ta un punto cu Mansur a yega dilanti. Gobierno kiermen cu no mester yega na un surplus di 1%, pasobra na 2026/27 nan lo yega surplus riba 2%. Pa 2026/27 Maduro ni Wever-Croes necesariamente lo ta tumando e decisionnan. E gobierno actual no por mara e gobiernonan di futuro. E parlamento actual no por mara e parlamentonan di futuro y esey ta loke ta mira. Mansur no ta compronde dicon RMR por a acepta esey. Lo comunica tur e preocupacionnan aki na nan, el a indica.
Pa mas cobertura lesa TREMPAN.
