Por lo menos un minister a vota contra di e decision den Conseho di Minister pa aproba e ley di consenso di Rijkswet Aruba financieel toezicht (RAft). Di e ocho ministernan cu ta forma parti di Conseho di Minister, un a opta pa vota contra y asina subraya cu e no ta di acuerdo pa entrega nos autonomia financiero na Madre Patria. Minister Dangui Oduber a sigura cu den historia lo bay cu e tabata contra e decision aki.
Dangui Oduber ta yiu di ex-Minister Presidente Nel Oduber, cu a lucha man den man cu defunto Betico Croes. P’e ta un dolor grandi mira cu despues di pasa e RAft cu un ambtenaar na Den Haag lo dicidi riba inversionnan y cua gasto ta aproba pa haci na Aruba. Cu esaki, por premira cu un tratamento di e ley di consenso den Parlamento di Aruba tambe lo por topa cu e tipo di sorpresanan asina.
Discusion for di 14 aña pasa
E discusion cu si mester haci supervision financiero un asunto di Reino Hulandes en bes di via Parlamento di Aruba a cuminsa for di aña 2010 caba, ora cu Corsou y Sint Maarten a bira pais. Solamente cu Hulanda a paga tur debe di Corsou y Sint Maarten, pero no a ofrece Aruba e mesun acuerdo aki a cambio di dicho supervision. Aruba e tempo ey a gradici e “deal” y a laga Hulanda sa cu no ta desea ningun sorto di supervisiong financiero y cu nos ta hopi orguyoso di nos “independencia financiero”.
Asina mes, como cu nos no tabata cumpli cu reglanan di bon gobernacion, relaciona cu aspecto financiero, na aña 2014 Gobierno di Hulanda a forsa nos di acepta e ley di Landsverordening Aruba tijdelijk financieel toezicht (LAft) pa crea College Aruba financieel toezicht (CAft) cu a haya e rol pa supervisa nos finansa publico pa un periodo di tres aña.
Presupuesto supletorio 2017
E problema di e gobierno actual cu Hulanda a start na aña 2017, asina cu nan a asumi poder. E tempo ey a bay haci un wega politico pa laga AVP mustra malo y ta e mesun hugada aki a hinca nan den un problema serio. Door di benta AVP bou bus y laga nan mustra malo dilanti Hulanda, a haci mas debe cu tabata necesario y sin cu nan tabata sa of tabata consciente cu ora haci mas debe, Aruba automaticamente no ta cumpli mas cu e normanan di CAft y cu esey automaticamente a desemboca den alarga e trabou di supervision di Hulanda riba Aruba.
No mester lubida cu na fin di 2017 Gabinete Wever Croes I, recien instala, a aumenta e deficit door di baha e entradanan y aumenta e gastonan di manera excesivo. Mientras cu e presupuesto supletorio cu e gobierno saliente, esta Gabinete Mike Eman II, a laga atras tabata cumpli cu e norma di LAFT pa 2017 (0,5% di GDP), Gabinete Wever-Croes I a aumenta esaki te na -3,0% di GDP, cu tabata e norma di aña 2015. Ta bon pa menciona acerca cu Gabinete Mike Eman II a baha e deficit di -9.4% na 2014 pa -0.5% na 2017.
E aumento di deficit aki tabata consisti di impuestonan di compania estatal, cu tabata debe cu a wordo cobra na 2018, a calcula un deficit den presupuesto di AZV sin cu AZV tabatin esaki definitivo, a inclui gastonan di renobacion di bestuurskantoor y a aumenta e cantidad di empleado publico di Gobierno. E tempo ey cu consentimento di Ministerie van Binnenlandse Zaken en Koninkrijksrelaties (BZK) y CAft, Gobierno di Aruba a haya un beginkapitaal di 300 miyon florin!
Door di e prestamo aki, Aruba di forma delibera, a bay di acuerdo automaticamente pa alarga presencia di CAft na Aruba, aplicando e ley di LAft. Pasobra den e acuerdo inicial, tabata stipula cu si cumpli cu e normanan y baha e deficit presupuestario, lo conduci cu CAft ta stop di existi na Aruba y cu nos lo crea nos propio begrotingskamer. Door di a fia mas, nos a pasa nos deficit y a hinca nos den prolongacion di presencia Hulandes na Aruba.
Protocol november 2018
Dia 22 di november 2018 Gobierno di Aruba a firma un protocol pa extende supervision financiero cu normanan nobo. E protocol aki su duracion lo a extende e normanan di prespuesto. E protocol aki ta contene extension di e supervision financierio y tambe adaptacion di e ley di supervision financiero di aña 2015 (LAft) te na final di termino di Gabinete Wever-Croes I. Aki a inclui condicionan mas estricto pa garantisa sostenibilidad di finansa publico.
Na juni 2019, despues di hopi bay bin, Gobierno di Aruba a presenta e concepto di ley pa adapta e LAft manera palabra. Sinembargo, mayoria den parlamento (coalicion di MEP-POR-RED) a aproba un amienda y a cambia esencia di e supervision financiero den su totalidad! A elimina e rol di CAft y Conseho di Minister di Reino y a duna Parlamento e rol di supervisor ademas di ta co-legislador. Dus Parlamento ta aproba presupuesto y e mes ta haci supervision financiero!
LAft
Bayendo bek na e LAft, e cambio riba e ley aki Gobierno a presenta na juni 2019, cu mester tabata den liña cu e protocol firma na november 2018. Gobierno no a defende e ley debidamente y a lag’e na merced di coalicion di e tempo ey, cu a presenta un amienda cu tabata desbarata e supervision financiero y totalmente contrario na loke cu Gobierno di Aruba a palabra cu Gobierno di Hulanda. Prome Minister Wever-Croes “no tabata sa” cu Parlamento lo a bin cu e cambio y bou pretexto cu “Parlamento ta manda” no a desconseha e amienda tampoco.
Asina Gabinete Wever-Croes I deliberadamente a laga Parlamento elimina e rol di CAft y di Conseho di Minister di Reino, cu tabata clave den e supervision financiero y pone su mes como e supervisor. Cu e amienda y e LAft aproba, Parlamento a tira e bala bek pa Gobierno.
Den nos sistema legal, e legislado ta gobierno hunto cu parlamento. Normalmente gobierno ta aproba un ley den Conseho di Minister, mand’e parlamento pa tratamento y na momento cu e ta aproba door di sala e ta haya valides ora cu public’e. Den caso di leynan di iniciativa of amienda (dus cu ta inicia na Parlamento), e dinamica ta contrario: parlamento ta aproba prome y djey e ta bay Gobierno pa Conseho di Minister aprob’e.
A aproba e LAft, incluso su amienda den parlamento, a bay gobierno pa aprobacion… y nada! Te dia di awe ta e LAft di aña 2015 ta vigente, cu consecuencia cu no tin normanan financiero ni condicionnan enforsabel y parlamento a pone su mes practicamente un banda! Den democracianan parlamentario NORMAL, un Gobierno cu no ta duna oido na decision di Parlamento mester saca su conclusion. Na Aruba, e LAft nobo a disparce den lachi y ningun hende a hik, sigur no e miembronan di Parlamento.
Obviamente den caso cu Conseho di Minister lo a ratifica e LAft manera cu Parlamento a amandeer, lo a risca cu e ley lo a wordo elimina door di Su Majestad Rey Willem Alexander pa medio di un Koninklijk Besluit (KB) y Gabinete Wever Croes I lo a goberna bou di un Algemene Maatregel van Rijksbestuur (AMVRB).
Tur partido sa di RAft
Ta for di juli 2020 caba, na momento cu Aruba a bay fia placa di Hulanda, a acorda cu lo introduci Rijkswet Aruba financieel toezicht (RAft). Nos a tuma e placa, nos a uz’e y hinc’e den nos economia y a priminti cu den dos aña lo pag’e completo bek. Ora e dos aña a transcuri, Aruba a pidi Hulanda pa duna nos un chens mas, pa pag’e na october di e aña aki. Pero awo cu nos mester paga, awo nos kier bay un guera cu Gobierno di Hulanda. Por lo menos MEP, Raiz y sigur AVP ta para hunto den esaki, esta di nos ta desea pa haci e supervision financiero un asunto di Reino Hulandes. E partidonan Accion 21 y MAS a bisa publicamente cu nan si ta na fabor, pasobra Corsou y Sint Maarten tin e y nan ta bayendo bon.
Ironia ta cu a bin eleccion na aña 2021, tur partido tabata sa di e existencia di RAft, a bay eleccion bisando cu nan ta OK cu ne y awo tur hende ta haci comosifuera ta algo nobo of cu nan no tabata sa. Probablemente den pueblo mayoria hende lo ta na fabor pa Hulanda asumi un rol mas activo den supervision di nos finansa publico pasobra partidonan politico di Aruba a demostra for di aña 1986 cu esey nos mes NO por!
Conclusion
- Poniendo COVID un banda, Gabinete Wever Croes I & II sistematicamente y structuralmente a traha e caminda pa un supervision financiero regla na nivel di Reino.
- Na aña 2017 a bay dos aña atras pa loke ta e normanan di presupuesto extendiendo e supervision financiero cu tres aña mas.
- No a adapta e LAft manera a palabra na fin di 2018 cu Hulanda.
- A laga parlamento elimina e rol di CAft y Conseho di Minister di Reino den e amienda di LAft na 2019 y a haci Parlamento supervisor ademas di co-legislado.
- Y awor nan ta haya straño cu Gobierno di Hulanda ta exigi cu supervision financiero regla na nivel di Reino??
Tocante CAft
Riba dia 2 di september 2015 a institui College Aruba financieel toezicht (CAft), conoci tambe como Colegio di Supervishon Financiero Aruba. Nan tarea ta encera monitoria y duna conseho, riba adaptacion y ehecucion di presupuesto di pais Aruba, kedando den balans y den e limitenan acorda, pa por cumpli cu pago di debenan. CAft por duna conseho sea cu Gobierno a pidi of no. Contrario na e otro paisnan den Reino Hulandes, pa Aruba ta aplicabel un norma di saldo di financiamento, pues e saldo presupuestario kitando e pago di e debe estatal. CAft ta consisti di Lidewijde Ongering (Presidente), Hans Hoogervorst (postula pa Hulanda) y Hellen van der Wal (postula pa Aruba).
