E ta masha normal cu por lo menos despues di e paradanan oficial di SMAC cu Serlimar cu su team ta pasa y haci e ruta limpi. Ta netamente locual a pasa cu e ultimo parada di Carnaval 70.
E personal compaña pa polis a percura pa haci henter e ruta limpi. A start for di Avenida Milio Croes, drenta Vondellaan y termina riba L. G. Smith Boulevard.
A observa cu pueblo a gosa di e parada pero a laga hopi sushedad atras. Claro, algun lo bisa cu ta nan trabou pa haci limpi.
E team a topa cu bastante caha di cerbes bashi, cos di come, parasol, stoel te hasta sapato cu kit di make up. A pasa henter marduga ta haci e ruta limpi asina percura pa dialuna mainta e ruta a lanta limpi limpi atrobe.
