Na Aruba hopi hende ta preocupa p’e echo cu awa di Bubali Plas ta bay lama, banda di Eagle Beach. Aki hende sa landa, pasa un rato agradebel. Gobierno no a cera e beach aki, mientras cu na Massachusetts tin rond di binti beach cera.
Recientemente den noticia Mericano a bin dilanti cu binti beach cera pa e echo di nivel halto di bacteria. Prome tabata ocho beach, pero desde diahuebs ultimo esaki a aumenta pa binti.
Departamento di Conservacion y Recreacion na Merca a habri 81 ‘freshwater’ y ‘saltwater’ p’e temporada, prome cu e fin di siman di ‘Memorial Day.’ Pero tur cos a para e siman siguiente na momento cu a cuminsa cera e beachnan.
Representante di Departamento Salud Publico di Massachusetts (DPH na Ingles) a informa cu ora e beachnan ta cera, nivel halto di bacteria esaki ta debi na yobida (storm). “Esaki ta pasobra e yobida ta bay cu bacteria of hopi nutricion di tera pa lama, y e nutricionnan ta permiti un populacion chikito di bacteria reproduci rapidamente na un nivel peligroso.”
![](https://24ora.com/wp-content/uploads/2024/06/WhatsApp-Image-2024-06-14-at-21.55.40.jpeg)
Con hopi ta test e awanan n’e beachnan ta varia den estado, pero esakinan ta tuma luga di dia pa luna, asina un funcionario a informa. El a bisa acerca cu e frecuencia di test ta depende con hopi problema di calidad di awa e beach tin.
DPH a informa pakico ta peligroso pa landa den e awa yena di bacteria. E sintomanan ta:
· Problema di gastrointestinal manera sacamento, nausea, diarea y dolor abdominal.
· Sintoma respiratorio manera garganta hincha, tos, nanishi ta core y niester.
· Sintoma di dermatologo (na cuero) manera rash y picason.
· Sintoma di infeccion di wowo y horea manera iritacion, fastioso di horea.
· Sintoma di griep manera keintura y calor friu.
![](https://24ora.com/wp-content/uploads/2024/06/CK8A3776-1-1920x1280.jpg)
Aki na Aruba no ta cera e beach dilanti RWZI di Bubali Plas. Aunke Minister Arends a splica cu ta controla e awa pa mira si no tin nada cu por perhudica hende su salud of di medio ambiente, tin persona ta keda cu e duda. Tin persona ta desea di sa kico ta e nivel di bacteria n’e area aki y con peligroso e por ta. Tambe e mandatario a sigura cu e awa cu ta bay lama ta refina y no sushi.
![](https://24ora.com/wp-content/uploads/2024/06/Front-1-1920x1280.jpg)