Bo conoce un hende cu ta ‘micro-manage’, bo ta traha pa un persona cu ta ‘micromanage’ of bo mes ta un manager cu ta haci esaki? ‘Micromanaging’ ta ora e persona encarga ta controla tur su trahadornan te na ultimo detaye. Den otro palabra, ‘micromanaging’ ta ora es cu ta na poder ta controla esnan bou di dje na un manera extremo.
Locual cu ta pasa ta como lo siguiente:
E manager aki hopi biaha tin falta di confiansa den su mesun liderazgo, e tin miedo di perde e control y p’e motibo aki, e ta cuminsa mete tur caminda. E manager aki no tin e competencia di delega bon domina. Pues di por pasa e trabou pa esnan bou di dje y duna nan espacio pa nan haci e trabou riba nan mes.
Sinembargo si bo manager ta ‘micro manage’ bo, no tuma esaki personal. Kisas e manager ta insigur den su mes y den su manera di lidera y maneha. Kisas e persona aki no ta conciente of no ta suficiente educa di locual ta pasando. Pa e motibo aki ta bon pa ambos e trahador y e manager tin empatia pa otro y yuda otro mehora esaki. Ta importante si pa e manager reconoce esaki, y ta importante p’e trahador papia esaki cu su manger pa asina crea espacio pa e desaroyo personal di e trahadornan y desaroyo di e manager.
Consecuencia ora ta ‘micro-manage’:
- E manager ta impedi e desaroyo di su trahador. E trahador no tin espacio pa explora su mesun potencial.
- E trahador no ta siña tuma responsabilidad pa su decision, pasobra e no por tuma desicion sin e manager su autorisacion.
- E trahadornan no ta desaroya creatividad propio, pasobra e manager no ta duna espacio p’esaki. Constantemente e manager lo desea e trabou pa ta haci na su mesun manera.
- Bo trahadornan ta traha cu miedo pasobra e manager ta den nan nek ta warda p’e haci fout pa e por coregi y hasta critica of reclama.
- Bo trahadornan talentoso ta bay laga e compania paso nan ta sinti nan mes stagna y demasiado controla.
- E manager mes tin posibilidad di ‘burn out’ paso e ta stress su mes mucho cu otro nan trabou y por causa cu e ta cay atras cu su trabounan mes.
Pe motibonan aki ta importante pa ta mas habri pa papia over di e tema aki y no lag’e ta un obstaculo den e relacion cu bo coleganan. Manager por reflexiona mas riba e ‘feedback’ di su trahadornan pa mehora esaki. Manager por traha cu ‘duidelijk afspraken’ pa asina e diferencia di locual ta ser entrega, no ta desvia di locual e manager ta ‘verwacht’. Manager por tuma mas curso di liderazgo y pa asina por haya mas confiansa di con pa lidera su trahadornan. Al final cu comunicacion nos por logra hopi mas di locual nos ta kere.
Skirbi pa: Gillmar Werleman
