Tur aña Departamento di Impuesto ta saca nan cobransa di grondbelasting den e periodo aki. Segun vocero di DIMP, Meverly Romano, e ta un cobransa cu tur persona cu tin un propiedad inmobil ya ta custuma cu ne.
Nan sa cu den e periodo aki por spera un cobransa. E aña aki esey ta e caso tambe. DIMP a caba di saca e cobransa di 2021. Su fecha oficial ta 31 di mei. E prome termino di pago ta caduca aki un luna cu ta dia 30 di juni. Ley di grondbelasting ta permiti e personanan cu tin grondbelasting, pa paga e belasting den termino. Cada termino ta igual cu un kwartaal di aña. Cada termino ta vence na final di e kwartaal. Awor aki tin e prome mita di aña ya ta bayendo. E prome termino ta caduca dia 30 di juni. Segun ley e personanan cu a haya e cobransa, lo mester paga 50% di e suma pa dia 30 di juni.
E siguiente 25% ta e siguiente kwartaal of na final di kwartaal, cual ta dia 30 di september. E ultimo termino cu ta caduca dia 31 di december, mester ta paga dia 3 di januari, debi cu dia 31 di december ta un dia cu normalmente ta liber. E ora e fecha final ta schuif pa e proximo dia di trabao.
Ley ta duna espacio na e contribuyentenan pa haci e pago di grondbelasting. Por sosode cu e cobransa, of e suma di e cobransa ta di tal forma cu e contribuyente no por haci su pago. Den esaki DIMP ta duna e facilidad na e contribuyentenan pa haci un areglo di pago.
Den esaki e ora, e contribuyente por haya mas espacio, un termino mas largo pa asina e por cumpli cu e pago di e cobransa aki. Na e momentonan aki tin e plan di alivio fiscal vigente, caminda cu ta duna e facilidadnan di pagonan flexibel cu periodonan mas largo caminda cu e contribuyente por haci un areglo di pago y paga su belasting den e lapso di 12 luna. Ta depende kico e contribuyente mes ta desea. E por scoge pa haci e pago di belasting den un solo biaha. E por scoge pa cumpli cu e terminonan di pago manera cu ley ta bisa. Pero tambe e por haci un areglo di pago, pa asina e por paga su belasting den un periodo tiki mas largo.
Tur esaki ta posibilidadnan cu e contribuyente tin. Loke ta recomenda pa no keda sin actua.
Pa mas detaye lesa matutino TREMPAN.
