Diadomingo marduga, dia 30 di juni, a tuma luga e di 11 edicion di MetaFit Walk & Run 2024. Eddie de Veer, CEO di MetaCorp, a cuminsa e mainta cu un discurso dedicando MetaFit Walk & Run 2024 na Mario Maduro, mirando cu e ta un persona cu ta representa dedicacion. Ta trata aki di un participante activo den tur MetaFit Walk & Run, no solamente den e caminata final sino tambe den tur training y otro eventonan den preparacion pa e caminata.
“Si tin un persona cu ta dedica n’e deporte di coremento y canamento ta Mario.” Eddie de Veer a conta cu a sorprende Mario na su cas pa dun’e algun reconocimento. Diadomingo marduga a bolbe duna Mario un reconocemento simbolico, di e manera aki a gradicie pa su sosten y dedicacion admirabel.
Fo’i trempan
MetaCorp a cuminsa trempan cu e preparacionnan e aña aki, nan a cuminsa prepara desde luna di januari caba. Esnan tras di e evento aki ta e boluntarionan y e departamento di Recurso Humano (HR) di MetaCorp cu ta lidera e comision di MetaFit. Tur hende a traha duro pa logra cu e preparacionnan. Pa Eddie de Veer, e mainta tabata uno satisfactorio, mirando e cantidad di hende cu a participa. For di 4:00 am e team di MetaFit tabata cla pa yama bonbini na tur participante.
Atleta special
Un di e momentonan special di e evento, tabata e donacion na Beyond Sport Limit Foundation Aruba. A regala un total di tres stoel special pa core cu cinco atleta special. E organisacion a core un total di 21 kilometer.
Record
Eddie de Veer, CEO di MetaCorp, a indica cu e aña aki a logra kibra record mirando cu aña pasa tabatin un total di 1.500 participante pero e aña tabatin 2.525 participante pa MetaFit. E reto di mas grandi ta e anticipacion, mirando cu mester tene cabes enfoca riba e caminata. Gerencia a gradici specialmente e boluntarionan, e team di Harley Davidson, polis, Rode Kruis, e teamnan di deporte, e trahadonan di MetaCorp, pa a organisa y yuda guia e tremendo evento aki.
Tocante MetaFit
E evento “MetaFit” a cuminsa na aña 2005 solamente pa empleado, pa motiva nan pa keda fit y hiba un bida saludabel. Na aña 2010 a opta pa habri e participacion y haci posibel cu publico no empleado di MetaCorp tambe por participa. E aña aki tabata e di diesun edicion di MetaFit Walk & Run. Mester menciona cu door di pandemia, no a organisa e evento durante tres aña, esta na aña 2020, 2021 y 2022. Aña pasa a reanuda e caminata atrobe.
