Mervin Wyatt-Ras cu ta Parlamentario di AVP ta presente na Hulanda pa atende e reunion di IPKO. E tambe ta splica con e ta prepara pa atende cu e temanan di interes. E intencion di tur delegacion ta pa traha hunto y el a resalta den discurso di cada presidente di parlamento.
Mervin Wyatt Ras a splica tambe cu e tema cu mester traha riba dje ta esun di Geschillen Regeling. Esaki ta un tema cu nos tin algun aña ta traha riba dje. Tabata tin discusion y awo tin cambionan unda ora tin disputa ta laga Raad van State envolvi cu Bestuursrecht Spraak.
E departamento huridico di Aruba a duna su conseho y a discuti e procedura despues. Tur parlamento presente ta di acuerdo cu mester atende, pasobra tur tin consensus riba dje. Mester ta riba un liña y tur cos ta mustra cu e proposicion ta Aruba ta bay presente via minister plenipotenciario den conseho di reino. Mervin Wyatt Ras a splica tambe cu ora yega asina leu cada respectivo parlamento lo sostene esaki riba nan mes na nan respectivo pais. E ley ta tumando demasiado tempo.
E parti cu ta toca enseñanza di nos muchanan tin hopi studiante ta pasando dificil. No por haya vivienda y no por habri cuenta di banco. Ta dificil pa studiante haya acceso na cierto facilidad y ta algo cu mester traha riba dje. E parti di enseñanza na nos pais mester wak con por coopera cu otro. Mervin Wyatt Ras a splica cu ainda ta atendiendo e punto di sclavitud. Hulanda a pidi disculpa publicamente pero asina mes Hulanda lo traha riba e forma cu mester traha cu otro. Tin hopi forma di intercambia y coopera cu otro riba e area di trabou.
E mentalidad mester t’ey pa por atende e deficit democratico cu ta hunga un rol. Nos paisnan mester tin un rol mas participativo cu e decisionnan y cambionan cu ta tuma luga segun Mervin Wyatt. E proceso cu e Lands Pakket a cana y imponi pa gobierno Hulandes tambe ta algo cu mester discuti. Nos mester ta mas uni y a scucha con presidente di parlamento di Aruba ta boga pa esaki. Mientras tanto na Aruba e no ta demostra esaki y na Hulanda ta boga pe. Hasta den parlamento Presidente di Parlamento ta stroba hende si hiba palabra. Tin hopi tarea pa haci pa elimina e deficit cu tin pa haya informacion. No por bay te Hulanda pa papia di union y na Aruba no mag duna opinion. Presidente di Parlamento tin hopi pa siña. E intencion pa sali hunto y demas pais ta mustra cu nan ta habri pa uni y sali cu un front den e reunion di IPKO.
