Ayera, partido Movimiento Electoral di Pueblo (MEP) tabata tin nan parada di victoria despues di a resulta di ta e partido cu mayoria voto den eleccion 2021. MEP tabata tin un total di 20.701 voto. E parada a ranca sali fo’i San Nicolas y caba na Centro Deportivo Frans Figaroa.
Lider di partido MEP, mr. Evelyn Wever-Croes, durante parada a gradici tur hende cu a sali celebra den e parada di victoria, gradicimento y compromiso cu MEP no lo defrauda su votadonan. Wever-Croes a expresa cu tabata tin hopi reto den nan caminda, nan mester a competi contra 11 partido cu sin duda a “come di nan voto”, pero asina mes nan a mantene na nuebe. Lider di MEP e expresa: “Nos a gana eleccion, nos ta e partido di mas grandi. Esey ta yena mi cu alegria.”
A puntra e lider di partido cual ta su sentimento mirando cu partido MEP a bay atras cu poco mas di mil voto, el a menciona cu pa casi cuater aña den gobierno algo asina ta algo di spera. Y mas ainda den e temponan dificil cu nan a goberna. Evelyn Wever-Croes a menciona cu e lo por tabata pio, pues nan ta contento cu e resultado.
Ayera nan a celebra, pero despues di e celebracion nan lo uni pa sigui hiba e pais padilanti. Awe nan lo cuminsa cu e etapa di formacion, nan ta pendiente di gobernador, mirando cu el a invita tur lider di partido. MEP ta na turno diamars merdia. Di eynan nan lo wak con ta sigui.
Pa loke ta trata e parada, a dura por lo menos 2 ora dilanti di e rotonde di Pos Chikito. Tabata tin votado den e parada, pero tambe para band’i caminda creando nan mesun ambiente.
TOCANTE MEP
Tabata riba dia 9 di februari 1971 na Cumana 84 cu e hoben y dinamico lider Arubiano Betico Croes – den presencia y cu aprobacion di lider di bario for di tur skina di Aruba – a funda e partido di ideologia social democrata Movimiento Electoral di Pueblo (MEP).
Den e reunion aki a aprona e colornan y emblema di partido: color geel y cu leter cora. E emblema ta simbolisa un parha bulando riba Aruba buscando su libertad y iluminacion den e rayonan briyante di solo. Despues di 3 luna cu a funda MEP, un eleccion di Eilandsraad a tuma luga y partido den e periodo sumamente cortico aki toch a logra haya 7 asiento cual ta representa un tercer parti di e electorado Arubano. Sin duda cu MEP ta conta desde e tempo ey cu un nucleo solido, ya cu durante 46 aña di existencia di e partido nunca nan a yega di haya bou di 7 asiento, cual siguramente ta un logro historico den Reino Hulandes.
